اسلام آباد۔ 22ستمبر (اے پی پی) اشرف غنی حکومت نا چٹنگ آن پد اوغانستان ءِ شونہالی نا کنڈآ دننگ کن علاقائی واپار و شونداری سرجز آتے ٹی بشخ ہلنگ نا گرج مریک۔ چین پاکستان اقتصادی راہداری بیلٹ اینڈ روڈ انیشی ایٹیو غٹ آن زیات فعال راہداری تیان اسٹ ءِ، ہرانا رداٹ پاکستان نا طول و عرض اٹ برجا کشت وکشار، صنعت و راجی و اقتصادی شونہالی نا ڈٹ آتا ارٹ میکو ریسہ ٹی کم و ود 60ارب ڈالر نا زرکاری کننگانے۔ چائنا ڈیلی نا شینک کروک اسہ سرحال اسے نا رداٹ دی بیلٹ اینڈ روڈ انیشی ایٹیو مریس میعاد اقتصادی و پنجر نا شونداری نا پروجیکٹ ءِ ہراکہ ملک و جہانی ادارہ غاتے اسہ ایلو تون ملفک ہرانا مسخت انسانیت نا اسیجائی آخبت تون اسہ کمیونٹی اسے نا جوڑ کننگ ءِ۔ داٹی اوغانستان اٹی کمیونٹی تا پوسکن جوڑ کننگ اٹ کمک تروک آ غٹ میکنزم آک ساڑی ءُ۔ اوغانستان ءِ مون تروک ویل آتا سیاسی ایسری کن اوغان تا تینا کماشی ٹی و اوفتا تینا شونداری گام گیج بے کچ اہم ءُ۔ ہراوخت اسکان اوغانستان نئے بیرہ سیاسی وڑاٹ بلکن غٹ آن اہم اقتصادی و علاقائی واپار نا کمک اٹ واکدار مرے ہمووخت اسکان عسکریت پسندی وہڑدڑ نا ملک اٹی دُوارہ مننگ نا موقع مننگ کیک۔ وخت اس کہ ملک اٹی ہڑدڑ تالان کننگ نا علاقائی و جہانی اثرمرتب مریک۔ 2019اٹی، اوکان پد 2020اٹی، چین، پاکستان و اوغانستان نا سہ فریقی دیوان اڈ ہلک تانکہ سی پیک ءِ اوغانستان اسکان ودفنگ نا وڑوڈول آتیا گپ وتران کننگ مرے۔
