اسلام آباد۔ 21ستمبر (اے پی پی) صدر مملکت ڈاکٹر عارف علوی پارینے کہ جان جوڑ زند و پیری ٹی نسیان(است آن دننگ) نا ناجوڑی نا شدت اٹی کمتی کن ذہنی و جونی ورزش و نشوونما المی ءِ، انسانی تعلق نا بنداو ہمدردی ءِ۔ داخیال آتا درشانی ءِ او سے شنبے نادے آ الزائمر نا جہانی دے اناوخت آ نیشنل ڈیمنشاپلان نا بناءِ کننگ نا دود آن تران کرساکرے۔ صدر مملکت پارے کہ ہرانسان نا است خواہک کہ وئی نا ہر بشخ اٹ کس اسے نا محتاج مف۔ وئی نا آخیریکو بشخ اٹی انسان نا یات داشت کم مرساکیک۔ اوپارے کہ جان جوڑ زند و پیری ٹی است آن دننگ نا ناجوڑی نا شدت اٹی کمتی کن ذہنی و جونی ورزش و نشوونما المی ءِ۔ جون نا ورزش آن بدن اٹ توانائی ودی مریک ہنداوڑ، الزائمر آن نزور مروک آ دماغی خلیہ غاتے ذہنی مشق آتا کمک اٹ بحالی ٹی کمک رسینگک۔صدر ڈاکٹر عارف علوی پارے کہ وزیراعظم عمران خان لمہ نا یات اٹی اسہ عظیم ءُ مسخت اسے کن شوکت خانم میموریل ہسپتال ءِ تفے۔ اوپارے کہ میڈیکل نا تعلیم اٹ موروثی ناجوڑی تا بابت آگاہی تننگانے ولے دابابت ہچ ءُ جتا ءُ بشخ اس اف۔ اوپارے کہ پاکستان اٹی دنیا نا مقابلہ ٹی خاہوتی نظام سوگو ءِ۔ خاہوت اٹی بزرگ آتا پبی خیال ءِ تخنگک۔ خاہوت ءِ الزائمر نا ناجوڑ بزرگ آتا مشکل آتے سرپند مننگ المی ءِ۔ انسانی تعلق نا بنداو ہمدردی ءِ۔ صدر ڈاکٹر عارف علوی پارے کہ انفراسٹرکچر تون اوار اوار راج اٹ احساس ودی کننگ المی ءِ۔ داوخت آ گپ وتران کرسا وزیراعظم نا خصوصی کمکار قومی جان جوڑی ڈاکٹر فیصل سلطان پارے کہ راج اٹ جان جوڑی نا آسراتی فراوان کننگ کن ہرممکن گام گیج کننگ اُن۔ بزرگ آتے آسراتی فراوان کننگ کن غٹ وسیلہ غاتے کاریم اٹ اتنگ نا گرج ءِ۔ صوبائی وزیر جان جوڑی پنجاب ڈاکٹر یاسمین راشد تینا تران اٹی پارے کہ تینا بزرگ آتا خیال ءِ تخنگ ننا دین نا بشخ ءِ۔ الزائمر نا بابت نیشنل ایکشن پلان اٹ صوبہ غاک بایدے اوار مریر۔ الزائمر سوسائٹی پاکستان نا صدر ضیاحیدر رضوی ہم تران کرے۔
