نیویارک۔ 21ستمبر (اے پی پی) وزیرخارجہ مخدوم شاہ محمود قریشی پنچ دے ئی دورہ غا نیویارک آ سرمس۔ جان ایف کینیڈی بالی پٹ آ، اقوام متحدہ ٹی پاکستان نا آخبتی مندوب منیر اکرم، امریکہ ٹی پاکستان نا سفیر اسد مجید و پاکستانی سفارت خانہ نا بڑزکو کمامدارآک وزیرخارجہ ءِ بخیرکریر۔ وزیراعظم عمران خان اقوام متحدہ جنرل اسمبلی نا 76می دیوان آن ویڈیو نا کمک اٹ تران کیک۔ وزیرخارجہ نیویارک اٹی اڈکننگ نا وخت آ، اقوام متحدہ جنرل اسمبلی نا 76می دیوان اٹی بشخ ہلنگ نا وخت آ چندی ملک آتا وزیرخارجہ و اقوام متحدہ نا سرکڑدہ غاتون اوڑدہی کیک۔ وزیرخارجہ کونسل آن فارن ریلیشنز نا کنڈآن اڈ ہلوک آ دود اٹی خاص گپ وتران کیک۔ وزیراعظم عمران خان نا اقوام متحدہ جنرل اسمبلی نا 76می دیوان آن پالیسی تران و وزیرخارجہ نا دورہ نیویارک آن پاکستان نا جہانی شریدار و جہانی ادارہ غاتون سفارتی رابطہ نا مون آ دننگ نا عکاسی مریک۔ وزیرخارجہ مخدوم شاہ محمود قریشی نیویارک اٹی ”پاکستان ہاؤس“ آ ہنا ہراڑے اقوام متحدہ ٹی پاکستان نا آخبتی مندوب منیر اکرم و سفارتی عملہ وزیرخارجہ ءِ بخیرکریر۔ وزیرخارجہ ”مہمان تا کتاب“ اٹی تینا تاثرآتے نوشتہ کرے۔
