اسلام آباد۔ 21ستمبر (اے پی پی) وزیر مملکت حوالکاری و شینکاری فرخ حبیب پارینے کہ پاکستان امن تون مہرومریبت کروک ءُ ملک اسے، پاکستان جہانی امن و سوگوی کن ہم تینا کڑد ءِ ادا کننگ ءِ، قوام متحدہ نا امن مشن اٹ پاکستان نا خذمت آک داہیت انا عملی نمونہ ءُ، اقوام متحدہ نا باسک مننگ آن پد ہم ہندوستان نا ظلم، بربریت و انسانی حق انا بھلا خلاف ورزی تیا جہانی برادری ءِ دوآبہ ءِ چٹفوئی مریک، اوغانستان اٹی امن کن پاکستان نا مخلصانہ کوشست آتا جہانی برادری نا کنڈآن ستاءِ کننگ انگ ءِ۔ دوشنبے نادے آ جہانی یوم امن آ تینا کلہو اٹی وزیر مملکت فرخ حبیب پارے کہ جہانی امن و سوگوی کن داتم اسکان پاک فوج انا 161ورنا شہید مسنو، پاکستان نا 22کروڑ الس جہانی امن کن شہید مروک آ پاک فوج انا ورناتے سلام پیش کیک۔ اوپارے کہ ڈیہہ ٹی ہندوستان نا مقبوضہ کشمیر اٹی بدامنی و ظلم ءِ کس اس خنپک۔ اوپارے کہ پرامن اوغانستان ہی پرامن پاکستان ءِ۔ اوپارے کہ اینو نا دے نن تینا سلہہ بند فوج و سیکورٹی فورس آتے ہم سلام پیش کینہ ہرافک مدامی امن و سوگوی کن تینا جان تا نذرانہ ءِ پیش کریر۔ اوپارے کہ پاکستان نئے بیرہ تینا ڈیہہ بلکن جہانی امن کن تینا مثبت کڑد ءِ ادا کرساکیک۔
