کوئٹہ۔ 21 ستمبر (اے پی پی) بلوچستان عوامی پارٹی نا راہشون و مسکوہی صوبائی وزیر ثوبیہ کرن کبزئی پارینے کہ وزیراعلیٰ بلوچستان جام کمال خان نا حکومت انشاء اللہ تینا پنچ سال ءِ پورو کیک، بلوچستان نا الس مچ آ صوبہ ٹی وزیراعلیٰ نا حق اٹی ریلی کشسا داداہیت ءِ پیدوار کرینو کہ او جام کمال خان ءِ وزیراعلیٰ ہُننگ خوارہ۔ داہیت ءِ او سے شنبے نادے آ اوڑدہی کروک آ زالبول آتا اسہ ڈل اسے تون گپ وتران کرسا پارے۔ اوپارے کہ بلوچستان عوامی پارٹی نا مرکزی صدر و وزیراعلیٰ بلوچستان جام کمال خان نا مخلوط حکومت مسہ سال اٹی صوبہ ٹی ریکارد شونداری کاریم کرفینے ہراڑآن صوبہ ناالس پبی فائدہ ہرفنگ ءُ۔ اوپارے کہ صوبائی حکومت زالبول و ورناتا ویل آتے ایسر کننگ کن پبی گام گیج کرینے ورناتے گوازی تا آسراتی فراوان کننگ کن ہرڈسٹرکٹ اٹ اسپورٹس کمپلیکس تفنگ انگ ءِ ہراڑآن ورناتے گوازی تا گچین آسراتی دوبریک۔ اوپارے کہ اپوزیشن ساڑی حکومت نا شونداری کاریم تیان خارزدہ ءِ واو وزیراعلیٰ نا برخلاف سازش آتے ٹی لگوک ءُ، تانکہ صوبہ ٹی برجا شونداری عمل ءِ لتاڑنگ مرے۔ اوپارے کہ اپوزیشن نا تحریک بے پتی بھاز بے وڑ بے سہب مریک بلوچستان عوامی پارٹی و اونا سیوتی جماعت وزیراعلیٰ نا کماشی ٹی یکجاءُ۔ اوپارے کہ بلوچستان نا الس وزیراعلیٰ جام کمال خان نا حق اٹی ریلی کشسا داپک کرینو کہ او جام کمال خان ءِ وزیراعلیٰ ہُننگ خوارہ۔
