اسلام آباد۔ 20ستمبر (اے پی پی) صدر مملکت ڈاکٹر عارف علوی پارینے کہ ننا الیکٹرانک وونٹنگ مشین اتون کاغد نا بیلٹ پیپرہم ساڑی ارے و دانا نظام فلپائن نا گچین کاری تیٹی کاریم اٹ اتوک آ الیکٹرانک مشین آن زیات گچین ءِ۔ دوشنبے نادے آ تینا ٹویٹ اٹی اوپارے کہ فلپائن اٹی الیکٹرانک وونٹنگ مشین نا گچین کاری تیٹی کاریم اٹ اتنگ نا تاریخ نا بارواٹ حساب وکتاب بے کچ اہم ءِ۔ اوپارے کہ الیکٹرانک مشین نا کاریم اٹ اتنگ آن وونٹر آتا پت اٹ ودکی، الیکشن پٹیشن، خون و بیدادی ٹی نمان کمتی واقع مس۔ حساب وکتاب نا رداٹ فلپائن اٹی 2007نا گچین کاری تیٹی روایتی کاغد نا کمک اٹ وونٹنگ نا نظام آن 6ہفتہ غان پد گچین کاری تا نتیجہ غاتا پڑو ءِ کننگا وخت اس کہ 2010و 2019اٹی الیکٹرانک وونٹنگ مشین نا کاریم اٹ اتنگ نا کمک اٹ وونٹنگ نا چٹنگ نا منہ گھنٹہ غان پد نتیجہ غاتا پڑو ءِ کننگا۔ فلپائن اٹی 2007اٹی 35درسد مخلوق اوڑآ پت کریکہ وخت اس کہ 2010و 2019اٹی پت انا دا کچ 75درسد و 89درسداسکان سرمس۔ 2007نا گچین کاری تیان پد گچین کاری تے چیلنج کننگ کن اسہ ہزار پٹیشن دائر کننگا وخت اس کہ 2010اٹی 49و 2019نا گچین کاری تیٹی 11پٹیشن دائر کننگا۔ صدر مملکت پارے کہ پاکستان اٹی ہم داوڑنا بدلی خنسا بھاز خوشی مریک۔ ننا داڑے، وونٹنگ مشین اتون کاغد نا بیلٹ پیپرہم ساڑی ءِ و ننا نظام داکان ہم زیات گچین ءِ۔
