اسلام آباد۔ 20ستمبر (اے پی پی) وزیرداخلہ شیخ رشید احمد اِرا شناختی کارڈ و پاسپورٹ تخوک آتے 31اکتوبراسکان مہلت ترسا پارینے کہ داوخت اٹی او تینا جعلی شناختی کارڈ و پاسپورٹ آتے کینسل کرفر، اسلام آباد اٹی مدرسہ نا معاملہءِ افہام و تفہیم اٹ ایسر کننگ نا کوشست کننگ اُن۔ کانود ءِ نزور تکنگپ، نیوزی لینڈ انا ٹیم ءِ فوج انا سیکورٹی تسن، اناگت پدی ہِننگ نا اوفتا فیصلہ غا افسوز ءِ، اسہ دے اس بریک کہ مچ آ دنیا نا ٹیمک دانگیابریرہ، 19و 20صفر آ چہلم نا وخت آ صوبہ غاتا گرج انا رداٹ پاک فوج، رینجرز و سول آرمڈ فورس تعینات کننگک، موبائل فون سروس ءِ گرج انا رداٹ بند کننگک۔ دوشنبے نادے آ پریس کانفرنس آن تران کرسا شیخ رشید احمد پارے کہ اوغانستان آن 16ہزار بندغ پیش تمانو، ہرافتے ٹی 4ہزار طورخم و چمن بارڈر آن دانگیا بسنو۔ اوپارے کہ نن اوغانستان اٹی امن و سوگوی نا خواہندار اُن۔ وزیراعظم عمران خان تاجکستان اٹی پاریسس کہ اوغانستان اٹی جامع حکومت اس جوڑ کننگ نا کوشست کننگک۔ اوپارے کہ ہرافتے تون 2پاسپورٹ، 2شناختی کارڈ ارے و ہرابندغ آتا ویزہ چٹانے، کابینہ ٹی سمری اس گدریفنگ اُن کہ اوفتے 31اکتوبر اسکان ہلنگک۔ دافتیان ہراسٹ کہ اسہ شناختی کارڈ یا پاسپورٹ ودڈراکننگ خواہک ہنداوخت اٹی کے۔ اوپارے کہ چہلم نا بابت دیوان اٹی فیصلہ کننگاکہ غٹ صوبہ غاتا موکل آن چہلم ناوخت آ موبائل سروس بند مریک۔ اوپارے کہ اسلام آباد اٹی 50نا جاگہ غا 100وارڈ آتے ٹی گچین کاری مریک۔ اسلام آباد نا بلاگر صحافی نا کسفنگ نا بابت ہراپروپیگنڈاءِ کننگاکہ، اونا خونی تے دزگیر کننگا و خونی اسلام آباد پولیس نا ریمانڈاٹی ءِ و ہمو اونا ریمانڈ ءِ ہلیک۔ اوپارے کہ اسلام آباد اٹی کم و ود 511مدرسہ و اسہ ہزار مسیت ءُ، دافتے ٹی بیرہ اسہ مدرسہ سے نا ویل مریک، انتظامیہ اوڑتون مذاکرات اٹی مریک تانکہ اونا ایسری اس کشنگ مرے۔ نن تین پہ تینی ٹی افہام و تفہیم اٹ باندات ءِ ایسر کننگ نا خواہندار اُن۔ اوپارے کہ نیوزی لینڈ نا ٹیم ہرادوبہ ءِ خلک تاریخ اٹی اولیکو وار کابینہ ٹی اودے آرمی نا سیکورٹی فراوان کرین۔ داخہ در نیوزی لینڈ نا فورس ہم اف۔ نن آخیریکو وخت اسکان کوشست کرین ولے ویل ایسر متو۔سیریز مفننگ نا سوب آن قوم ءِ ڈکھیائی و است ہسونی ضرور ارے ولے مایوس مننگ نا ضرورت اف۔ اسہ دے اس بریک کہ دنیا نا مچ آ ٹیمک دانگیا گوازی کننگ کن بریرہ۔
