دوشنبے۔ 17ستمبر (اے پی پی) وزیراعظم عمران خان پارینے کہ اوغانستان نا ویل ءِ غٹءِ اواری اٹ ایسر کروئی مریک، اوغانستان ءِ داریسہ غا تنیا اِلنگ مفک، اوغانستان ءِ تنیا ہلنگا تو چندی تنکی ودی مریک، شنگھائی کمکار تنظیم نادیوان اٹی بشخ ہلنگ کنکن گمر نا سوب ءِ وزیراعظم داخیا ل آتا درشانیءِ جمعہ نادے آ داڑے شنگھائی کمکار تنظیم ایس سی او نا 20می سروک دیوان آن تران کرسا کرے۔ اوپارے کہ واپار، زرکاری و رابطہ غاتا مون آ دننگ کن ایس سی او اسہ اہم ءُ پلیٹ فارم اسے، مواصلاتی رابطہ غاتیان ڈیہہ ٹی مثبت بدلی بریک۔ وزیراعظم کورونا دین انا ذکر ءِ کرسا پارے کہ داڑآن جہانی زرگزرانک زہمی مسنو۔ اوپارے کہ چاگڑدی بدلی ایلو اہم چیلنج ءِ ہرا دنیا ءِ مون تروک ءِ، پاکستان چاگڑدی بدلی نا اثرآتون مون تننگ کن بلین ٹری ڈٹ انا بناءِ کرینے۔ وزیراعظم اوغانستان نا حالیت آتا ذکر ءِ کرسا پارے کہ داسہ اوغانستان نا حقیقت ءِ دنیا ءِ امنا کروئی مریک، اوغانستان نا ویل ءِ غٹ ءِ اواری اٹ ایسر کروئی مریک، دا اوغان الس تون سلنگ نا وخت ءِ۔ اوپارے کہ پاکستان دہشت گردی نا برخلاف جنگ اٹ اہم ءُ کڑد اس ادا کرے، پاکستان دہشت گردی نا جنگ اٹ 80ہزار جون تا قربانی ءِ تسنے، ننا زرگزران ءِ دہشت گردی نا برخلاف جنگ اٹ نسخان رسینگا۔ وزیراعظم عمران خان پارے کہ موسمیاتی بدلی دنیا کن بھلو چیلنج اسے، نن گچین چاگڑد انا مون آ دننگ کن شجرکاری مہم نا بناءِ کرینن، نن ملک انا ہر ہموبشخ اٹ نیال خلکن ہراڑے سوزہ الوکہ۔ اوپارے کہ شجرکاری مہم نا دنیا نا چندی ملک آتے ٹی ستاءِ کننگانے۔ اوپارے کہ کشمیر نا ویل اقوام متحدہ نا قرارداد آتا رداٹ ایسر مرے۔ اوپارے کہ اوغانستان ءِ انسانی تنکی، خور، بنداوی گڑاو ایلو چیلنج آک مون تروک ءُ۔ اوپارے کہ نن آجو وتواجہ فلسطین نا مخ تفی ءِ کینہ۔
