ڈیجیٹلائزیشن و مالی اوار مننگ اٹ زالبول آتا بشخ ہلنگ آن جی ڈی پی ٹی نمان ودکی مریک، صدر مملکت ڈاکٹر عارف علوی نا ”مساوی بینکنگ پالیسی“ نا رونمائی دودآن تران

اسلام آباد۔ 17ستمبر (اے پی پی) صدر مملکت ڈاکٹر عارف علوی پارینے کہ ڈیجیٹلائزیشن و مالی اوار مننگ اٹ زالبول آتا بشخ ہلنگ ءِ پک کننگ آن جم قومی پیدوار (جی ڈی پی) ٹی ودکی مریک، دنیا نا تاریخ اٹ اسلام اولیکو وار زالبول آتے میرات نا حق ترسا اوفتے واکدار کرے، زالبول آتے واکدار کننگ کن زالبول پارلیمنٹ نا باسک آک ہم تینا کڑد ءِ ادا کیر۔ داخیال آتا درشانی ءِ او جمعہ نادے آ داڑے ایوان صدر اٹی سٹیٹ بینک آف پاکستان نا کنڈآن مالی اوار مننگ (فنانشل انکلوژن) اٹ زالبول آتا بشخ ہلنگ اٹ ودکی کن”مساوی بینکنگ پالیسی“ نا رونمائی دود آن تران کرسا کرے۔ دود اٹی صدر مملکت نا اُرائی ثمینہ علوی، گورنر اسٹیٹ بینک ڈاکٹر رضاباقر، بنجائی وزیرآک، ڈپٹی گورنر اسٹیٹ بینک ڈاکٹر سیماکامل، چندی بینک آتا سروک آک و سی ای اوز، پارلیمان نا باسک آک و بینک و مالیاتی ادارہ غاتا عہدیدار آک بشخ ہلکر۔ صدر مملکت پارے کہ زالبول آتے مالی وڑاٹ سوگو کننگ آن بیدس اوفتے واکدار کننگ مفک، دنیانا تاریخ اٹ اسلام اولیکووار زالبول آتے میرات نا حق ترسا اوفتے واکدار کرے و سورۃ النساء ٹی زالبول آتا میرات و حق انا تعین ءِ کننگا۔ انگلینڈ اٹی بیست می صدی اسکان زالبول آتے میراتی و مالیاتی حق ملتویسس۔ صدر مملکت پارے کہ اینو مچ آ دنیاٹی اولیت آتا اول سرآن تعین مننگ ءِ، ہندن ہندن زالبول آک واکدار مریرہ اوفتا استحصال مننگ کپک۔ صدر مملکت پارے کہ پوسکن آ دور انا خواست آتا رداٹ ننے تینا راج ءِ سرپند مرسا اونا رداٹ گام گیج کروئی مریک۔ صدر زالبول آتے واکدار کننگ نا بابت اسٹیٹ بینک انا کڑد انا ستاءِ کرے و پارے کہ اسٹیٹ بینک دا بابت چندی گام گیج کننگ ءِ۔ زالبول آتے واکدار کننگ کن زالبول پارلیمنٹ نا باسک آک ہم تینا کرڈ ادا کیر۔ داہیت ستاکڑزک کہ زالبول آتا حق انا رکھ انا بابت ساڑی آ دے تیٹی چندی اہم گام گیج کننگانے۔ صدر مملکت بلوچستان ہائی کورٹ نا اسہ ساڑی ءُ فیصلہ سے نا ستاءِ کرے ہراٹی عدالت گوندانے کہ ہراتم اسکان زالبول نا پن آ میرات منتقل مفک ہمووخت اسکان او جائیداد ءِ کس اسے ہم ٹیکی تننگ کپک۔ صدر پارے کہ زالبول آک حقی وڑاٹ ہمووخت آ واکدار مریرہ ہراتم تینا وسیلہ غاتیا اوفتے اختیار مرے، اسٹیٹ بینک و ایلو بینک آک 2023اسکان زالبول آتا بینک اکاؤنٹس آتا کچ اٹ ودکی نا ہراہدف ءِ مقرر کرینے او ستاکڑزک۔