اسلام آباد۔ 17ستمبر (اے پی پی) وزیرخارجہ مخدوم شاہ محمود قریشی پارینے کہ ڈیہہ نا کہول آ واپار، زرکاری و رابطہ غاتا مون آ دننگ کن شنگھائی کمکار تنظیم اہم ءُ پلیٹ فارم اسے، بھارت سپائلرنا کڑد ءِ ہلسا امن نا کوشست آتے ٹی بشخ ہلے۔ جمعہ نادے آ شنگھائی کمکار تنظیم نا دیوان 2021و علاقائی حالیت آتا بابت دوشنبے ٹی ہندی و جہانی میڈیا نا نمائندہ غاتون گپ وتران کرسا وزیرخارجہ پارے کہ کاسا1000، تاپی گیس پیپ لین و ریل لنک ڈٹ، مچ آ ڈیہہ کن اسہ وڑ فائدہ ئی جوڑ مننگ کیرہ۔ اوپارے کہ پاکستان و تاجکستان نا نیام اٹ بھاز کڑمب تعلقداری ءِ۔ شاہ محمود قریشی پارے کہ شنگھائی کمکارتنظیم نا سروک دیوان نا وخت آ پاکستان، روس، ایران و چین نا وزیر خارجہ غاتا دیوان اس مس۔ دادیوان اٹی اوغانستان نا حالیت آتیا گپ وتران کننگا۔ نن ڈیہہ ٹی امن و سوگوی کن اسیجائی لائحہ عمل اس تینا کننگ نا گرج آ امنا کرین۔ وزیرخارجہ خبڑدار کرے کہ اگہ اوغانستان اٹی حالیت خراب مریک تو جہانی دہشت گرد تنظیم تے تینا نیٹ ورک ءِ ودفنگ نا موقع دُوبننگ کیک۔ اوپارے کہ اوغانستان، تدوک آ اِرسال آن قحط سالی نا کیفیت آن دوچار ءِ اگہ اونا توننگتو تو ہموڑے انسانی تنکی ودی مننگ کیک۔ اوپارے کہ شنگھائی کمکار تنظیم نا دادیوان نا کمک اٹ نن سلابت اٹ علاقائی کہول آ اوغانستان نا بابت اسیجائی لائحہ عمل اس ٹہیفنگ کینہ۔ کنا سلاہ ٹی ہندوستان ءِ مرے کہ او پاکستان آ دوبہ خلنگ ءِ ہلسا پوسکن آ حقیقت تون مون ایتے۔ شاہ محمود قریشی پارے کہ اوغانستان اٹی پیش بروک آ حالیت و واقعہ غاتا بنداوی زمواری اوغانستان نا مسکوہی بے سہب حکومت آ بیٹ مریک۔ ہندوستان، دوحہ ٹی مروک آ بین الاوغان مذاکرات نا سرسہبی نا کسر اٹ غٹ آن بھلا اڑاند ئس۔ ہندوستان ءِ مرے کہ او سپائلر نا کڑد ءِ ہلسا، ڈیہہ نا امن و سوگوی ءِ مون آ تخسا، امن نا کوشست آتے ٹی بشخ ہلے۔
