اسلام آباد۔ 17ستمبر (اے پی پی) وزیراعظم نا خصوصی کمکار سی پیک اتھارٹی خالد منصور پارینے کہ چین پاک اقتصادی راہداری پاکستانی زرگزران نا شونداری نا اہم ڈٹ آتیان اسٹ ءِ و داڈٹ چین و پاکستان نا اسیجائی فائدہ غاتون ہم گرنچ ءِ۔ داخیال آتا درشانی ءِ او چائنا میڈیا پڑک ءِ انٹرویو ترساکرے۔ اوپارے کہ چین پاک اقتصادی راہداری نا تفنگ و ارٹ میکو ریسہ ٹی پترینگانے۔ دا ریسہ ٹی نن کشت وکشار، ٹیکسٹائل، دواجوڑ کننگ و انفارمیشن ٹیکنالوجی تون اوار چندی بشخ آتے ٹی خصوصی اقتصادی زون تیٹی برسا کاریم کننگ کن چینی کاروباری ادارہ غاتے بٹنگنہ۔ داڑآن پاکستان اٹ صنعتی و مینو فیکچرنگ ہند جوڑ کننگ اٹ کمک رسینگک۔ اوپارے کہ دی بیلٹ اینڈ روڈ انا شونداری تون اوار اوار اوغانستان ءِ اسیجائی شونداری نا موقع ملک۔ 10می اسیجائی رابطہ کمیٹی (جے سی سی) نا دیوان ہندا تُو انا آخیریکو ہفتہ ٹی اڈ ہلیک۔ اوسی پیک نا ارٹ میکو ریسہ نا رداٹ شونداری و شونہالی نا چرجوئی ءِ مون آ دننگ نا پاکستان نا عزم ءِ تالان کرسا پارے کہ داڑآن ہندی مخلوق کن بے شمار ملازمت ودی مریک۔
