اسلام آباد۔16ستمبر (اے پی پی): مزن وزیر عمران خان ءَ گوشت کہ پاکتان وتی “وژن نیامی ایشیا” پالیشی ءِ وسیلگ ءَ نیامی ایشیائی ملک آنی گوما دراج بُریں کساس ءَ یکوئی ءِ ودینگ ءِ واستہ جزمیگ انت۔ ترمیز- مزار شریف- کابل- جلال آباد- پشاور ءَ را ملارینگ ءِ ٹرانس اوگان ریلوے منصوبگ سک باز ارزشت دار انت۔ اوگانستان ءَ ایمنی ءُ برجائی پاکستان ءُ پڑ ءِ واستہ ارزشتی انت۔ اے گپ آئی ءَ پنچ شمبے ءِ روچ ءَ تاجکستان ءِ دارالحکومت دوشنبے ءَ شنگھائی کمکی گل ءِ مملکت آنی سروک دیوان ءِ موہ ءَ قزاخستان ءِ صدر قاسم جمرات توکائف ءَ گوں گند ءُ نند ءِ ساھت تران کنان ءَ کت اَنت۔ دوئیں سروک آں دو نیمگی یکوئی ءَ ھوار ارزشتی ایں میاں اوستمانی کار آنی ھوالگ ءَ ھیال ریچی کت۔ دوئیں سروک آں تجارت، سرمایہ کاری ءُ ٹرانسپورٹیشن لنکس ءَ ھوار جتا جتائیں شوبگ آنی تہ ءَ دو نیمگی یکوئی آناں گیش ودینگ ءِ جزم ءِ درشان کت۔ مزن وزیر ءَ اے گپ ءِ سر ءَ زور پر دات کہ پاکستان وتی “وژن سینٹرل ایشیا” پالیشی ءِ وسیلگ ءَ نیامی ایشیائی ملک آنی گوما دراج بُریں یکوئی آنی ودینگ ءِ واستہ جزمیگ انت۔ مزن وزیر ءَ ھاسیں رابطہ آنی ارزشت ءُ زر ءِ لُک تریں کشک پجاری کنگ ءِ پد ءَ پاکستان ءِ ارزشتی ایں پوزیشن ءِ سر ءِ زور پر دات۔ مزن وزیر ءَ ترمز – مزار شریف- کابل- جلال آباد- پشاور ءَ را ملارینوکیں ٹرانس اوگان ریلوے منصوبگ ءِ ارزشت ءَ را ھم سہرا کت۔ مزن وزیر ءَ چاگردی ءُ اقتصادی دیمروئی ءُ ملکی ترجی آناں جیو سیاست ءَ چہ جیو اکنامکس ءِ تہ ءَ ٹرانسفر کنگ ءِ وتی وژن ءِ ھم درشان کت۔ دوئیں سروک آں دمگی برجائی ءَ را دیمروئی دیگ ءِ واستہ زمینی ءُ بالی کشک آنی وسیلگ ءَ رابطہ آناں ودینگ ءِ ھم پیسلہ کت۔ دوئیں سروک آں مزن تکی سیاسی روگ ءُ آیگ ءِ کساس آناں ودینگ ءِ ھوالگ ءَ تپاک کت۔ مزن وزیر ءَ صدر توکائف ءَ را پاکستان ءِ تر ءُ تاب ءِ دعوت ھم دات وھدیکہ صدر توکایف ءَ مزن وزیر عمران خان ءَ را قزاخستان ءِ تر ءُ تاب ءِ دعوت ھم دات۔
