دوشنبے۔ 16ستمبر (اے پی پی) وزیراعظم عمران خان تاجکستان نا 2دے ئی سرکاری دورہ غا دوشنبے آ سرمس۔ تاجکستان نا وزیراعظم قاہر رسول زادہ وزیراعظم عمران خان ءِ بخیرکرے۔ وزیرخارجہ شاہ محمود قریشی، بنجائی وزیر حوالکاری چوہدری فواد حسین، بنجائی وزیر بحری امور سید علی حیدر زیدی، وزیراعظم نا سلاہکار واپار عبدالرزاق داؤد و نیشنل سیکورٹی ایڈ وائزرڈاکٹر معید یوسف ئسک ہم وزیراعظم تون اوار ءُ۔ وزیراعظم تاجکستان اٹی شنگھائی کمکار تنظیم (ایس سی او) نا سروکی دیوان اٹی بشخ ہلیک۔ وزیراعظم عمران خان تاجکستان نا صدر امام علی رحمانوف تون ہڑتوم آ کنڈآتا اوڑدہی کن صدارتی ماڑی نا دورہ ءِ ہم کیک۔ وزیراعظم پاکستان و تاجکستان نا نیام اٹ کاروباری بشخ اٹ کمکاری ءِ مون آ دننگ کن اسیجائی بزنس فورم آن تران ہم کیک۔ وزیراعظم دوشنبے ٹی ایس سی او نا 20می سروکی دیوان اٹی بشخ ہلنگ نا وخت آ دیوان اٹی شریک راہشون آتون اوڑدہی ہم کیک۔ دورہ ٹی وزیراعظم ایران، قزاخستان، بیلاروس و ازبکستان نا صدر آتون ہڑتوم آ کنڈآتا اوڑددہی کیک۔ ایس سی او سروک دیوان اٹی بشخ ہلنگ آن پد وزیراعظم عمران خان تاجک صدر تون اوڑدہی کیک۔ وزیراعظم عمران خان تون اوار اسہ بڑزکو کہولی وزارتی ڈل اس ہم ارے۔
