اسلام آباد۔ 16ستمبر (اے پی پی) صدر مملکت ڈاکٹر عارف علوی پوریاگر و صنعت کارآتیا زور شاغانے کہ او زالبول ومعذور بندغ آتے تینا ادارہ غاتے ٹی ملازمت ترسا اوفتا مالی اوار مننگ و واکدار جوڑ کننگ نا کوشست آتے ٹی تینا کڑد ءِ ادا کیر، حکومت تیناکاروبار کن سرسہب ورناپروگرام نا رداٹ 100ارب روپئی جتا کرینے، ورنا، زالبول و خصوصی بندغ آتے وام تا دوئی کننگ اٹ آسراتی و راہشونی فراوان کننگ نا گرج ءِ۔ داخیال آتا درشانی ءِ او سیالکوٹ چیمبر آف کامرس اینڈ انڈسٹری نا ڈل اتون گپ وتران کرسا کرے ہراچیمبرنا صدر قیصر اقبال بریار نا کماشی ٹی پنچ شنبے نادے آ داڑے ایوان صدر اٹی اوڑتون اوڑدہی کرے۔ ڈل صدر ءِ سیالکوٹ چیمبرآف کامرس اینڈ انڈسٹری نا برآمدی لائخی و ملک انا راجی و اقتصادی شونداری ٹی اونا شریدار نا بارواٹ معلومدار کرے۔ قیصر اقبال بریار صدر مملکت ءِ سیالکوٹ نا پوریاگر برادری ءِ مون تروک ویل آتیان ہم معلومدار کرے۔ صدر ڈاکٹر عارف علوی ڈل ءِ باور کرفے کہ سیالکوٹ چیمبرآف کامرس اینڈ انڈسٹری ءِ مون تروک ویل آتا ایسری ٹی المی کمک فراوان کننگک۔ ڈل اتون گپ وتران کرسا صدر مملکت پارے کہ افراد باہم معذوری ملکی آبادی نا 12آن 14درسد ءِ و اوفتے کاروباری برادری نا خصوصی کمک اٹ کسب نا فراوانی نا کمک اٹ صاحب روزگار و مالی وڑاٹ سوگو کننگ نا گرج ءِ۔ اوپارے کہ حکومت ورنا، زالبول و افراد باہم معذوری ءِ واکدار جوڑ کننگ و اوفتا مالی شمولیت آ چکار کننگ ءِ، داچرجوئی ٹی سرسہب ورناپروگرام نا رداٹ 100ار ب روپئی جتا کننگانے تانکہ او تینا کاروبار نابناءِ کننگ کیر۔ اوداہیت آ است ہسونی نا درشانی ءِ کرے کہ آگاہی نا کمتی نا سوب آن مخلوق حکومت نا کنڈآن پیش کروک آ وام تیان پبی فائدہ ہرفنگ کتنے و وام تا دوئی کننگ کن اوفتا آسراتی و راہشونی نا گرج آ زور شاغا۔ اوکان پد راولپنڈی، اسلام آباد و اٹک چیمبرز آف کامرس اینڈ انڈسٹریز نا زالبول نمائندہ غاتیا تالان اسہ ڈل اس ہم صدر مملکت تون اوڑدہی کرے ہرااکتوبر اٹ سینہ نا کینسر نا بارواٹ مخلوق اٹ شعور بیدار کننگ نا بات گام گیج آتیا گپ وتران کرے۔ ڈل سینہ نا کینسر نا بابت آگاہی مہم اٹ تینا کمک نا سلہ ءِ خلک و صدر ءِ باور کرفے کہ او این جی اوز، زالبو ل یونیورسٹی و کالج و ایلو تعلقدار ادارہ غاتا کمک اٹ داناجوڑ نا بارواٹ آگاہی ودی کننگ اٹ تینا کڑد ءِ اداکیک۔
