اسلام آباد۔ 16ستمبر(اے پی پی)بنجائی وزیر داخلہ شیخ رشید احمد پارینے کہ پاکستان اوغانستان اٹی پائیدار امن نا خواہندار ءِ، دنیا ءِ اوغانستان اٹی زمینی راستکی تے سرپند مننگ ناگرجءِ، طالبان تے حکومت سازی و ملکی باندات آتے چلیفنگ اٹ وخت تننگے۔ داخیال آتا درشانی ءِ او اقوام متحدہ نا ہائی کمشنر مہاجرین فیلپو گرانڈی تون گپ وتران کرساکرے ہراپنچ شنبے نادے آ داڑے اوڑتون اوڑدہی کرے۔ اوڑدہی ٹی اوغانستان آن پیش تمنگ و اوغان شاری تیکن انسانی امداد نا بابت گپ وتران کننگا۔ اوڑدہی ٹی امنا کننگاکہ اوغان شاری تے ساڑی آحالیت آتے ٹی تنیا ہلنگ پننگک و انسانی بنداو تیا اوغان شاری تیکن خور، دوائی و ایلو المی آ گڑاتا بست وبند ءِ کننگک۔ بنجائی وزیر داخلہ شیخ رشید احمد پارے کہ پاکستان ہمسایہ ملک اوغانستان اٹی پائیدار امن نا خواہندار ءِ۔ طالبان تے حکومت سازی و ملکی باندات آتے چلیفنگ کن وخت تننگے۔ دنیاءِ اوغانستان اٹی زمینی راستکی تے سرپند مننگ نا گرج ءِ۔ اوپارے کہ طالبان تے اوغانستان اٹی گورننس کن مالی و انسانی وسیلہ غاتے پک کروئی مریک۔ طالبان تا زیر حکومت اوغانستان نا اسہ ہی دے اٹی یورپ آنبار شونداری ممکن اف۔ اوغانستان اٹی ممکنہ انسانی قحط بدامنی و لاکانودیت ءِ ودی کننگ کیک۔ اوپارے کہ انسانی ہمدردی نا رداٹ خور و دوائی تا ٹرک و جہاز اوغانستان آ گدریفینن۔ ساڑی آحالیت آتے ٹی پاکستان اوغان شاری تا انسانی ہمدردی نا بنداو آ امداد ءِ برجاتخک۔وزیرداخلہ پارے کہ ساڑی آ رداٹ پاکستان اٹی نئے اوغان مہاجر اسے نئے مہاجر کیمپ اس۔ اوغانستان آن درملکی و اوغان شاری تے کشنگ کن آسراتی ہند 24گھنٹہ کاریم کننگ ءِ۔ اوڑدہی ٹی ہائی کمشنر مہاجرین فیلپو گرانڈی پارے کہ پاکستان نا 30لکھ اوغان مہاجر نا پدیسہ خیالداری ٹی کڑد ستاکڑزک۔ اقوام متحدہ اوغان شاری تے تنیا الیپک، اوفتا ہرممکن کمک ءِ کینہ۔
