اسلام آباد۔ 16ستمبر (اے پی پی) قومی زرگزران نا چندی بشخ آتیا تالان کاروباری برادری ئسک پارینو کہ واپاری ڈل انا دورہ تاجکستان آن قومی برآمدات، نیامی ایشیائی منڈی تسکان رسینگ و کاروباری برادری نا تین پہ تینی رابطہ غاتا مون آ دننگ اٹ کمک رسینگک۔ کوئٹہ چیمبر آف کامرس نا نائب صدر اخترکاکڑ پارینے کہ وزیراعظم عمران خان نا تاجکستان نا دورہ ٹی پوریاگرآتا پنجا باسکی ڈل ءِ تین تون دنننگ نا فیصلہ بھاز ستاکڑزک۔ ڈل اٹ اوار غٹ بندغ آتا تعلق ملکی زرگزران نا چندی بشخ آتیان ءِ۔ واپاری ڈل انا دورہ تاجکستان نا بابت وزیراعظم عمران خان و سلاہکار واپار عبدالرزاق داؤد نا گام گیج ستاکڑزک۔ اوپارے کہ واپاری ڈل انا دورہ غان پاکستان نا برآمد آتا مون آ دننگ اٹ کمک رسینگک۔ پرائم انسٹیٹیوٹ آف ہیلتھ سائنسز نا چیئرمین رحمت اللہ واجد واپاری ڈل انا دورہ تاجکستان نا بابت حکومتی گام گیج آتا بارواٹ تینا تاثرآتا درشانی ءِ کرسا پارے کہ کاروباری ڈل ءِ دورہ تاجکستان نا موقع فراوان کننگ بھاز ستاکڑزوک ءُ گام اسے ہراڑآن ہڑتوم آ ملک آتا کاروباری برادری ءِ اسہ ایلو ناآزموندہ غاتیان فائدہ ہرفنگ نا موقع ملک۔ اوپارے کہ وزیراعظم عمران خان نا کماشی ٹی پاکستان شونداری نا مزل آتے طے کننگ ءِ و دا چرجوئی برجاسلک۔ اوپارے کہ پاکستان نا کاروباری برادری وزیراعظم نا وژن نا پبی سپورٹ ءِ کیک و کاروباری بشخ انا شونداری نا بابت ہروڑنا ممکنہ کمک فراوان کننگ ءِ۔ اوپارے کہ ننا کوشستءِ کہ ہربشخ انا برآمد آتے مون آ دننگے ہرافتے ٹی انسانی وسیلہ غاتا بشخ ہم اوار ءِ۔ اوپارے کہ پاکستان بھاز زوت شونداری نا کنڈآکاہک۔ ڈیوس فارماسیوٹیکل لیبارٹریز نا سروک و پاکستان فارما سیوٹیکل مینو فیکچرنگ ایسوسی ایشن نا سینٹرل ایگزیکٹیو کمیٹی نا باسک امان شیخ دابابت پارینے کہ تاجکستان نا دورہ غان پوسکن آکاروباری وارخواہی پٹنگ اٹ کمک رسینگک و داڑآن قومی برآمد آتے مون آ دننگ دوئی مریک۔ سرحد چیمبر آف کامرس اینڈ انڈسٹری نا نائب صدر جنید الطاف پارینے کہ وزیراعظم عمران خان نا علاقائی واپار نا مون آ دننگ نا وژن نا رداٹ وزیراعظم نا دورہ تاجکستان نا وخت آ اسہ بھلو واپاری ڈل اس ہم دوشنبے آ ہِننگ ءِ ہراڑآن چندی زرگزرانی بشخ آتے ٹی ہڑتوم آ ملک آتا تین پہ تینی تعلقداری تا مون آ دننگ اٹ کمک رسینگک۔ اوپارے کہ داکان مست ہم اسہ پاکستانی ڈل اس تاجکستان نا دورہ ءِ کریسس و ہمووخت آ ہڑتوم آ ملک آتا کاروباری برادری اسیجائی ڈٹ آتا بناءِ کننگ نا بابت باقاعدہ معاہدہ ہم کریسر۔ بنجا ایوان ہائے صنعت وواپار پاکستان نا گلگت بلتستان نا نمائندہ پارے کہ وزیراعظم عمران خان تینا درملکی دورہ غاتے ٹی ملکی مصنوعات آتے درستی راستی کرفنگ کن خصوصی گام گیج کیک و ہنداسوب ءِ کہ ساڑی آ دورہ نا وخت آ ہم اسہ بھلو واپاری ڈل اس تاجکستان آ ہِننگ ءِ۔ واپاری ڈل اٹ اوار اسہ مندوب اس پارے کہ نیامی ایشیانا منڈی آ چکار نا کمک اٹ پاکستان روس اتون اوار یورپی منڈی تسکان گچین رسینگ دوئی کننگ کیک۔ فیصل موورز پڑک نا سروک محمد شہزاد تینا تاثرآتے ٹی پارے کہ جی سیون ملک آتا تین پہ تینی رابطہ غاتا مون آ دننگ کن فیصل موورز پڑک ہروڑنا ممکنہ کمک فراوان کننگ کن سنبرینگوک ءِ۔ آل پاکستان ڈرائی پورٹس ایسوسی ایشن نا چیئرمین حاجی فوزان پارے کہ وزیراعظم عمران خان نا ساڑی آ دورہ تاجکستان آن پاکستان و نیامی ایشیائی ملک آتا تین پہ تینی واپاری رابطہ غاتے مون آ دننگ دوئی مریک۔
