اسلام آباد۔ 16ستمبر (اے پی پی) بنجائی وزیر حوالکاری و شینکاری چوہدری فواد حسین پارینے کہ ملک اٹی تیل انا نہاد آک داسہ ہم ڈیہہ ٹی غٹ آن کم ءُ، 75درسد آبادی نا کٹیا ٹی خاطرخواہ ودکی مسنے۔ پنچ شنبے نادے آ تینا اسہ ٹویٹ اسے ٹی اوپارے کہ پاکستان اٹ تیل انا نہادآک داسہ ہم ریجن اٹی غٹ آن کم ءُ۔ یاتو مسہ سال اٹی تیل انا دُون پیش تماکہ ورنہ پاش ءِ ہراتم تیل پیشن آن ہلوئی ءِ تو نہادآک ودرہ۔ ہندااصول ایلو درآمد آتے کن ءِ۔ چوہدری فواد حسین پارے کہ اصل سرسہبی دادے کہ 75درسد آبادی نا کٹیا ٹی ہم خاطرخواہ ودکی مسنے۔ بنجائی وزیر پارے کہ پاکستان نا ہلنگ نا وس ہندوستان آن جوان ءِ۔ تنخواہ دار تپہ نا مشکل آک تینا جاگہ غا ولے 60درسد آبادی کشت وکشار تون وابستہ ءِ ہرافتے 1100ارب روپئی ودکی کٹیا مس۔ اوپارے کہ تعمیرات و انڈسٹری تون وابستہ کروڑ آ مخلوق نا کٹی اٹی ہم ودکی مس، مستری و مزور آتا دیہاڑی مسہ ہنداخہ پین ودا۔
