اسلام آباد۔ 16ستمبر (اے پی پی) بنجائی وزیر حوالکاری و شینکاری چوہدری فواد حسین پارینے کہ تاجکستان و پاکستان نا خڑکی برادرانہ تعلقداری ءِ، وزیراعظم ہراتم ہم پیشن نا ملک آ دورہ کن ہنا، اوپاکستان نا الس نا وقار ءِ بڑزکرے، تاجکستان نا اوغانستان نا بابت کڑد اہم ءِ، نن اونا کڑد انا اہمیت ءِ امنا کینہ، وزیراعظم نا دورہ تاجکستان اِرابشخ آتیا تالان مریک، وزیراعظم تینا دورہ ٹی شنگھائی کمکار تنظیم نا 20می دیوان و بزنس کانفرنس اٹ بشخ ہلیک۔ پنچ شنبے نادے آ وزیراعظم نا دورہ تاجکستان نا بابت گپ وتران کرسا بنجائی وزیر حوالکاری چوہدری فواد حسین پارے کہ وزیراعظم اینو بڑزکو کہولی ڈل اسے تون اوار تاجکستان نا دارالحکومت دوشنبے آ روانہ مننگ ءِ، وزیراعظم نا دورہ اِرا بشخ آتیا تالان ءِ، اولیکو بشخ اٹی وزیراعظم شنگھائی کمکار تنظیم(ایس سی او) نا 20می دیوان اٹی بشخ ہلیک، شنگھائی کمکار تنظیم نا دیوان نا وخت آ ایلو باسک ملک آتا سروک آک ہم ساڑی مریرہ۔ دورہ نا وخت آ وزیراعظم نا ایران نا سروک مملکت، چین نا وزیر خارجہ و نیامی ایشیانا اہم سرکڑدہ غاتون اوڑدہی مریک۔ اوپارے کہ وزیراعظم عمران خان نا روس انا صدر پیوٹن تون اوڑدہی طے ئس، صدر پیوٹن قرنطینہ ٹی مننگ نا سوب آن دوشنبے آ بفننگ ءِ، صدر پیوٹن ووزیراعظم عمران خان نا ٹیل فون آ سرجمی اٹ ہیت مس، وزیراعظم عمران خان و صدر پیوٹن نا نیام اٹ اوڑدہی نا زوت گمان ءِ۔ اوپارے کہ وزیراعظم عمران خان ءِ تاجکستان نا صدر امام علی رحمانوف تاجکستان نا دورہ نا سلہ خلکوسس۔ تاجکستان و پاکستان نا خڑکی برادرانہ تعلقداری ءِ، وزیراعظم عمران خان تاجکستان اٹی مروک آ بزنس کانفرنس اٹ بشخ ہلیک، بزنس کانفرنس اٹ پاکستان و تاجکستان نا نیام اٹ کاروباری رابطہ غاتے ودفنگ آ ہیت مریک، اوغانستان نا حالیت آک داکانفرنس نااہم بشخ مریرہ۔ اوپارے کہ تاجکستان نا اوغانستان نا بابت کڑد اہمءِ، نن اونا کڑد انا اہمیت ءِ امنا کینہ۔ تاجکستان نا دورہ ٹی اوغانستان اٹی سوگو و جامع حکومت نا بارواٹ ننا نظریہ ءِ سوگوی ملک۔ اوپارے کہ وژن سینٹرل ایشیاپاکستان نا فارن پالیسی نا اہم ءُ بشخ اسے، داداورہ اوڑکن مزل نا نشان مریک۔ بنجائی وزیر حوالکاری پارے کہ وزیراعظم ہراتم ہم پیشن نا ملک آ ہنا، اوپاکستان نا الس نا وقار ءِ بڑزکرے، دورہ تاجکستان ہم ہندا چرجوئی نا اسہ کڑی اسے۔
