اسلام آباد۔ 16ستمبر (اے پی پی) وزیراعظم نا خصوصی کمکار قومی جان جوڑی ڈاکٹر فیصل سلطان پارینے کہ پاکستان اٹی کورونا دین انا برخلاف نن غٹ اتون سلابت نا حکمت عملی اس تینا کرین، کورونا دین انا تشخیص کن مستند لیبارٹری جوڑ کننگا، کورونا دین انا تالانی ءِ توننگ کن سمارٹ و ٹارگٹڈ لاک ڈاؤن نا پالیسی ءِ تینا کننگا۔ داخیال آتا درشانی ءِ او پنچ شنبے نادے آ انسٹیٹیوشن آف ریجنل سٹڈیز نا کنڈآن ویبینار آن تران کرسا کرے۔ خصوصی کمکار پارے کہ کورونا دین انا برخلاف نن غٹ اتون سلابت نا حکمت عملی اس تینا کرین۔ کورونا دین اٹی اہم فیصلہ کننگا و اوفیصلہ غاتیا عملدرآمد کننگا۔ اوپارے کہ کورونا دین اٹی وائرس نا تشخیص کن مستند لیبارٹری جوڑ کننگا۔ آکسیجن نا فراوانی ءِ پک کننگا۔ کورونا دین انا تالانی ءِ توننگ کن سمارٹ و ٹارگٹڈ لاک ڈاؤن نا پالیسی ءِ تینا کننگا ہرانا مچ آ دنیا ٹی ستاءِ کننگا۔ کورونا ویکسی نیشن کن نادرانا ڈیٹاغان فائدہ ہرفنگا۔ اوپارے کہ دادین اتون اسٹ اس ہم تنیا مقابلہ کننگ کتوکہ۔ غٹ مخلوق ءِ اواری اٹ ہنسا چلینگوئی ئس۔ دادین اٹی انت کہ فیصلہ سازی اس کننگاکہ اوڑکن المی ئس کہ ملک انا غٹ مخلوق تون سلابت کننگے۔ اوپارے کہ ہڑدے ئی بنداو آ ہراحساب و کتاب ءِ دوئی کننگاکہ اوفتا بارواٹ المی ئس کہ پک مریر۔ اوپارے کہ مثبت حکمت عملی اٹ کورونا دین انا ناجوڑ آتے کن آکسیجن و کٹ آتاکمتی نا ویل ءِ مر کننگا و دابابت ڈاکٹرز، نرسز و پیرامیڈیکل اسٹاف ءِ آب اٹ ٹریننگ ترفنگا۔ کورونا دین اٹی غٹ تر ویل آتے سرپند مرسا اوفتے ایسر کننگ تون اوار اوار مخلوق نا زرگزرانی کمک ءِ احساس پروگرام نا کمک اٹ کننگا۔ ولدا ویکسی نیشن نا ریسہ بس تو اوٹی بھاز انگا ویل آک مون تروک ئسر ولے ننا گچین حکمت عملی آن داریسہ ہم سرسہبی اٹ برجاءِ۔ داڑکن نادرانا ڈیٹاغان فائدہ ہرفین و اینو ہم نن دا قابل اُن کہ نن اسہ شناختی کارڈ نمبر اسے نا کمک اٹ داپاننگ کینہ کہ ہراسٹ ءِ ویکسین لگانے یا ہراسٹ ءِ لگتنے۔
