اسلام آباد۔ 15ستمبر (اے پی پی) وزیراعظم عمران خان تعلقدار محکمہ غاتے پارت کرینے کہ سیل و سواتی ہند آتیا ٹورسٹ ریزاٹ و جہانی آب انا ہوٹل جوڑ کروک آتے کن حکومت نا کنڈآن آسراتی بشمول خراج اٹ چھوٹ آ مبنی سلاہ پیش کننگے تانکہ اوفتے زوت آن زوت حتمی دروشم اس تننگ مرے۔ داخیال آتا درشانی ءِ او چارشنبے نادے آ تینا کماشی ٹی نیشنل کوآرڈنیشن کمیٹی سیل و سوات نا دیوان آن تران کرسا کرے۔ وزیراعظم عمران خان دیوان آن تران کرسا پارے کہ ملک اٹی سیل وسوات نا بے شمار پوٹینشل ارے، گرج داہیت انا ءِ کہ دا پوٹیشنل ءِ پورو وڑاٹ کاریم اٹ اتنگے و سیل وسواتی ہند آتیا جہانی آب انا آسراتی تے پک کننگے۔ وزیراعظم جہلم و اونا ایب وکیب اٹ واقع ریسٹ ہاؤس و ایلو تاریخی ہند آتا ذکر ءِ کرسا پارے کہ داماڑی تا بحالی کن پبلک پرائیویٹ پارٹنر شپ ماڈل ءِ کاریم اٹ اتنگے۔ وزیراعظم پارت کرے کہ سیل وسوات نا بابت پدسلوک باندات آتے اولیتی بنداو تیا ایسر کننگے۔ وزیراعظم عمران خان پارے کہ سیل و سوات نا بشخ اٹ بے تحاشا وارخواہی ارے ہرافتے کاریم اٹ اتنگ نا گرج ءِ، سیل وسواتی ہند آتیا جہانی آب انا آسراتی تے پک کننگے۔ دیوان اٹی وزیرحوالکاری چوہدری فواد حسین، خصوصی کمکار ڈاکٹر شہباز گل وتعلقدار وزارت آتا سیکرٹریک ہم ساڑی ئسر۔ دیوان اٹی وزیراعلیٰ خیبرپختونخوا محمود خان وایلو صوبائی کمامدارآک ہم ویڈیو لنک انا کمک اٹ دیوان اٹی بشخ ہلکر۔ دیوان اٹی مچ آ ملک انا سیل وسواتی ہند آتا مون آ دننگ کن کروک آ گام گیج آتا جاچ ءِ ہلنگا۔ دیوان ءِ پاننگاکہ صوبہ پنجاب اٹی چار سیل وسواتی ہند آتے کن سیل و سوات نا بشخ اٹ زرکاری نا مون آ دننگ و مینجمنٹ کن جہانی ادارہ نا خذمت آتے دوئی کننگانے۔ ہنداوڑ صوبہ خیبرپختونخوا ٹی ہم چار انٹیگریٹڈ ٹورازم زون تا ماسٹرپلان نا مسودہ ءِ تیار کننگانے ہرافتے حتمی دروشم اس تننگ انگ ءِ۔ دیوان ءِ پاننگاکہ صوبہ پنجاب اٹ سیل و سوات نا بابت ذیلی کانود و ریگولیشن ءِ حتمی دروشم اس تننگانے و زوت دادے نافذ کننگک وخت اس کہ خیبرپختونخواٹی اودے نافذ کننگ انگ ءِ۔ وزیراعظم ءِ اٹک و بالاحصار قلعہ ءِ سیل وسواتی ہند جوڑ کننگ نا بابت پیش رفت آہم حوال تننگا۔ دیوان ءِ پاننگاکہ سیل وسواتی ہندآتیا پرایئر سفاری سروس نا بناءِ کننگ کن سول ایوی ایشن نا کنڈآن تینا قاعدہ ٹی ترمیم کننگانے و دانا نتیجہ ٹی نجی بشخ اکن بے شمار وارخواہی ودی مسنے۔ دیوان ءِ چندی سیل وسواتی ہند آتے کن ڈیسٹی نیشن مینجمنٹ پلان نا تیاری نابابت داتم اسکان نا پیش رفت آہم حوال تننگا۔ دیوان ءِ پاننگاکہ سیل وسوات نا مون آ دننگ کن ہرچار آ صوبہ غاتے ٹی سنٹرلائزڈ ٹورازم ویب سائٹ پورو وڑاٹ فعال ءِ۔ گورنمنٹ ریسٹ ہاؤس و گورنرہاؤس آتے الس کن دوئی کننگ نا بابت پیش رفت آ حوال تننگا۔
