نوشکی و چاغی ٹی فورجی سروس نا فراوانی ستاکڑزک، چیئرمین سینیٹ محمد صادق سنجرانی

اسلام آباد۔ 15ستمبر (اے پی پی) چیئرمین سینیٹ محمد صادق سنجرانی پارینے کہ صوبہ بلوچستان آن تعلق مننگ نا خاطر داہیت آ گمرمحسوس کیوہ، نوشکی و چاغی نا ضلع غاتے ٹی فورجی سروس نا فراوانی ستاکڑزک، شونداری ڈٹ و پوسکن آ ٹیکنالوجی اسکان رسینگ نا کمک اٹ بلوچستان قومی شونداری نا مرکزی دنگ اٹ اوار مننگ ءِ۔سے شنبے نادے آ یونیورسل سروس فنڈ وٹیلی نار نا نیام اٹ صوبہ بلوچستان نا ضلع چاغی و نوشکی ٹی ترند رفتار موبائل براڈ بینڈ فورجی ڈٹ آتا معاہدہ غا دستخط کننگ نا دود اٹی بشخ ہلوک آتیان تران کرسا اوپارے کہ شونداری ڈٹ و پوسکن آ ٹیکنالوجی اسکان رسینگ نا کمک اٹ بلوچستان قومی شونداری نا مرکزی دنگ اٹ اوار مننگ ءِ۔ غٹ اسٹیک ہولڈرآتیا زور شاغیوہ کہ او صوبہ بلوچستان ناایلو پدسلوک علاقہ غاتے ٹی تینا کوشست آتے زیات آن زیات و متنوع کیر۔ نوشکی و چاغی نا ضلع غاتے ٹی فورجی سروس نا فراوانی ستاکڑزک۔ چیئرمین سینیٹ محمد صادق سنجرانی پارے کہ صوبہ بلوچستان آن تعلق مننگ نا خاطر داہیت آ گمر محسوس کیوہ کہ مچ آ صوبہ ٹی مخلوق ناگچینی کن بھاززیات اہمیت نا حامل ڈٹ آتیا کاریم نظر بننگ ءِ۔ اودااومیت نا درشانیءِ کرے کہ پوسکن آ ٹیکنالوجی صوبہ بلوچستان نا چاغی و نوشکی ضلع غاتے دنیا نا ڈیجیٹل نقشہ غا اتنگ اٹ اہم کڑد اس اداکیک۔ چیئرمین سینیٹ پسماندہ علاقہ غاتے ڈیجیٹل و واکدار کننگ کن کاریم کننگ آ وزارت آئی ٹی و ٹیلی کمیونیکیشن و غٹ اسٹیک ہولڈرآتے مبارکبادی تس۔ اومستی پارے کہ صوبہ بلوچستان داسہ ہم ٹیکنالوجی نا بنداو ی پنجر نا ڈٹ آتے ٹی ایلو صوبہ غاتا نسبت بھاز پدی ءِ۔ چیئرمین سینیٹ دااہم ڈٹ آتے ٹی تینا بشخ ءِ شاغوک آ غٹ اسٹیک ہولڈر آتا منت واری ءِ ہرفے۔ اوچاغی و نوشکی ضلع غاتا مخلوق ءِ داترند رفتار موبائل براڈ بینڈ 4جی سروس نا فراوانی آ مبارکبادی پیش کرے۔ چیئرمین سینیٹ پارے کہ مچ آ دنیا ٹی ٹیکنالوجی و ڈیجیٹلائزیشن اٹ بھاز زیات زرکاری مننگ ءِ۔ انفارمیشن اینڈ کمیونیکیشن ٹیکنالوجی ننا زند انا ہر پلو اٹ انقلاب اس ایسونے چائے او ذاتی مرے یا پروفیشنل مچ آ دنیا نا راجی و زرگزرانی آخبت داسہ ترند رفتار ڈیجیٹل رابطہ غا منحصر ءِ۔ یو ایس ایف و ٹیلی نار نا ڈیجیٹلائزیشن شریداری پسماندہ علاقہ غاتے  پوسکن آ علاقہ غاتا بریبر اتنگ اٹ کمک ایتک و داڑآن ہندی آبادی تے بے مٹ وارخواہی فراوان مریک۔ چیئرمین سینیٹ پارے کہ صوبہ بلوچستان نا علاقہ دالبندین اٹ یونیورسٹی ہم جوڑ کننگ والا اُن و ملک ءِ مون آ دننگ کن آخبت اٹ آئی ٹی نا کڑد بھاز اہم مریک۔ اوپارے کہ 70آن 80ہزار زائر ہنداروٹ اٹ سفرکیرہ۔ داسروس نا فراوانی آن صوبہ بلوچستان نا مخلوق نا احساس محرومی ءِ چٹفنگ اٹ کمک رسینگک۔