اسلام آباد۔ 15ستمبر (اے پی پی) وزارت داخلہ اسٹ آن زیات پاسپورٹ تخوک آ بندغ آتے ودکی پاسپورٹ منسوخ کرفنگ کن ایمنسٹی تننگ نا فیصلہ کرینے ہرانا رداٹ دوہرے پاسپورٹ تخوک شاری تے 90دے انا مہلت تننگک وخت اس کہ وزیرداخلہ ڈی جی پاسپورٹ اینڈ امیگریشن ءِ دا چرجوئی ٹی سمری اس تیار کننگ نا پارت کرینے ہرادے کابینہ غا گدریفنگک۔ وزارت داخلہ نا کنڈآن چارشنبے نادے آ جاری بیان نارداٹ داچرجوئی ٹی وزیر داخلہ شیخ رشید احمد نا کماشی ٹی دیوان اس اڈہلک۔ دیوان اٹی سیکرٹری داخلہ یوسف نسیم کھوکھر و ڈی جی پاسپورٹ ڈاکٹر نعیم رؤف اس بشخ ہلکر۔ وزارت داخلہ ءِ دوہراپاکستان نا 1629درخواست دوئی مسنے ہراپالیسی مفننگ نا سوب آن پدسلنگ نا گواچی ءُ۔ ایمنسٹی نا بابت حتمی منظوری کابینہ غان ہلنگک۔ دیوان اٹ وزیرداخلہ ڈی جی پاسپورٹ اینڈ امیگریشن ءِ کابینہ کن سمری اس تیار کننگ نا پارت کرے۔ دیوان اٹی ایمنسٹی اسکیم کن چندی سلاہ تیا سجفنگا و اہم فیصلہ کننگا۔ دوہرے پاسپورٹ ایمنسٹی اسکیم کن درخواست تروک آتے بیرہ اسہ پاسپورٹ اس تخنگ نا موکل مریک۔ اسکیم نا رداٹ اسٹ آن زیات پاسپورٹ منسوخ کرفنگ کن 90دت انا مہلت تننگک۔ ایمنسٹی اسکیم آن فائدہ ہرفپروک آ بندغ آتا کیس ایف آئی اے ءِ گدریفنگک۔ ساڑی کانود اٹ اسٹ آن زیات پاسپورٹ تخوک آتا سزا ءِ کم از کم مسہ سال نا زندان ءِ۔ ایمنسٹی اسکیم آن اسٹ آن زیات پن والا پاسپورٹ تخوک آ اوورسیز پاکستانی تے فائدہ مریک۔ مستین اٹ شش ایمنسی اسکیم تا کمک اٹ 12ہزار پاسپورٹ آتا کلیئرنس ءِ کننگانے۔
