اسلام آباد۔ 15ستمبر (اے پی پی) سرسہب ورناپروگرام نا سروک عثمان ڈار پارینے کہ سرسہب ورنا پروگرام مچ آ ملک اٹی 19ارب روپئی نا بشخنگ نا عمل ءِ پورو کرینے، زوت سرسہب ورنا پروگرام اسپورٹس نا دنیاٹی ہم تہلکہ مچائفک۔ چارشنبے نادے آ تینا اسہ بیان اسے ٹی عثمان ڈار پارینے کہ سرسہب ورناپروگرام نا وام تا بشخنگ اٹ مست آن ہم زیات ترندی بسنے۔ نئے صوبائی تعصب نئے تینا تے نوارفنگ، سرسہب ورناپروگرام نا آب بیرہ میرٹ آٹیءِ۔ اوپارے کہ ہفتہ وار اپ ڈیٹ اٹ سرسہب ورناپروگرام نا صوبہ غاتے ٹی است بڈ کارکڑد مون آ بسنے، سرسہب ورناپروگرام مچ آ ملک اٹی 19ارب روپئی نا بشخنگ نا عمل ءِ پورو کرے۔ اوپارے کہ صوبہ پنجاب وام تا بشخنگ و روزگار ودی کننگ اٹ گوءِ درے، صوبہ سندھ انا وام تا فراوانی و روزگار اٹی ارٹ میکو نمبرءِ۔ عثمان ڈار پارے کہ حساب وکتاب نا رداٹ صوبہ پنجاب اٹی داتم اسکان 14ار ب روپئی نا وام ورناتے ٹی بشخنگا۔ پنجاب اٹی داتم اسکان 11ہزار 21ورناتے وام رسینگانے، ہرکاروزبار سرسہب مس، صوبہ پنجاب اٹی سرسہب ورنا پروگرام نا وام آن 22ہزار 335نوکری ودی مس، مچ آ پنجاب اٹی پین 14ہزار 856ورناتے منہ دے تیٹی وام ملک، سندھ اٹی سرسہب پروگرام نا رداٹ بنجائی حکومت مسہ ارب روپئی ناوام فراوان کرینے، صوبہ سندھ اٹی بنجائی پروگرام نا رداٹ 4ہزار آن زیات ورناتے روزگار ملانے۔ صوبہ سندھ اٹی مسہ ہزار ورناوام تا زرآن تینا کاروبار نا بناءِ کرینو۔ مچ آ سندھ اٹی پین 3ہزار آن زیات ورناتے وام ملک و اوفتے اہل گوندنگانے۔ عثمان ڈار پارے کہ صوبہ سندھ اٹی 10ارب روپئی بشخنگ نا ہدف ءِ مقرر کرینن و مچ آ زر ءِ بشخنہ۔ اوپارے کہ زوت سرسہب ورنا پروگرام اسپورٹس نا دنیاٹی ہم تہلکہ مچائفک۔ سرسہب ورنااولمپک، سرسہب ورنا ٹیلنٹ نا معلوم کننگ تون اوار گوازی تا وارخواہی ودی کیک۔
