ملتان۔ 15ستمبر (اے پی پی) برصغیر نا عظیم روحانی پیشوا شیخ الاسلام حضرت غوث بہاوالدین زکریا سہروردی ملتانی ؒ نا 782می سالانہ عرس انا مسہ دے ئی دود چارشنبے نادے آ ایسر مس۔ دربارعالیہ نا سجادہ نشین مخدوم شاہ محمود قریشی مزار آ حاضری تس و پھل آتا چادراس شاغا۔ عرس انا ایسری دود آن تران کرسا شاہ محمود قریشی دعاکرفسا پارے کہ کنے داہیت انا احساس ارے کہ عر س اٹ مچ آ ملک آن زائر آک داٹی بشخ ہلنگ خوارہ ولے کورونا نا دین انا رداٹ عرس انا دود آتے کچ اٹ کروئی تما۔ ہرازائرآک است خواہی آن پد ہم بشخ ہلنگ کتوس ای اوفتے کن دعا کیوہ کہ اللہ تعالیٰ اوفتے تون اوار غٹ امت مسلمہ نا روا حاجت آتے قبول کے و غٹ ویل آتیان نجات ایتے۔ شاہ محمود قریشی پارے کہ ای اللہ تعالیٰ آن دعا کیوہ کہ پاکستان امن نا وت اس جوڑ مرے۔ داڑے دہشت گردی چٹے و شونداری نا مزل آتے ترندی اٹ طے کے۔ اوپارے کہ عرس انا دود آتے ٹی جماعت غوثیہ نا مدام کلیدی کڑد اس مریک۔ اللہ تعالیٰ اونا خذمت آتے قبول کے و ای داہم دعا کیوہ کہ ملک تہہ نا بے چیٹی و پیشن نا یلغار آن محفوظ مرے۔ شاہ محمود قریشی پارے کہ ہندوستان پاکستان نا برخلاف وڑوڑنا چم کننگ ءِ۔ ای دعا کیوہ کہ اوناعزم مش تا مرے۔ اوپارے کہ اولیا اللہ نا آستانہ نا درگہ غاک غٹ اکن ملوک ءُ۔ انگریز، سکھ و ایلو دور آتون اوار مشکل آن مشکل حالیت آتے ٹی داآستانہ غاتیان فیض برجاسلیسنے۔ اوپارے کہ کورونا نا سوب آن محدود نشست نا بست وبند ءِ کننگانے انتئے کہ کورونا اسہ دین اسے ہراخننگپک، ولے تینا اثرآتے ہلک۔ اوغانستان نا بابت اودعا کرفسا پارے کہ اللہ تعالیٰ اوغانستان ءِ امن نا وت اس جوڑ کے انتئے کہ ڈیہہ ٹی امن کن اوغانستان نا پرامن مننگ المی ءِ۔
