اسلام آباد۔ 14ستمبر (اے پی پی) صدر مملکت ڈاکٹر عارف علوی کینسرنا بابت آگاہی و زوت تشخیص نا گرج آ زور شاغسا پارینے کہ داگام گیج آتیان مرض انا خطرہ غاتے کم کننگ اٹ کمک رسینگک، پاکستان اٹ کینسر نا مرض اٹ ودکی مننگءِ ہرانا توننگ کن وخت آ تشخیص و درمان نا جوان آسراتی المی ءِ۔ داخیال آتا درشانی ءِ او سے شنبے نادے آ ملک اٹ کینسر نا کیس خاص وڑاٹ بریسٹ کینسر نا بارواٹ حوال دیوان نا کماشی ءِ کرسا کرے۔ دیوان اٹی چیئرمین کینسر کیئر ہاسپٹل اینڈ ریسرچ سینٹر لاہور پروفیسر ڈاکٹر شہریار، پروفیسر ڈاکٹر اریشہ زمان و پروفیسر ڈاکٹر نبیلہ شامی ئسک ہم ساڑی ئسر۔پروفیسر ڈاکٹر شہریار حوال ترساپارے کہ پاکستان اٹ ہرسال کم و ود 3لکھ 53ہزار بندغ کینسر نا مرض اٹ اختہ مریرہ ہرافتیان بیرہ 71ہزار ناجوڑ آتے جوان درمان دوئی ءِ وخت اس کہ ایلو درمان نا بس مفروک آسراتی تا سوب آن داڑآن محروم رہینگرہ۔ اوکینسر کیئر ہاسپٹل اینڈ ریسرچ سینٹر لاہور نا سرسہبی تے تالان کرسا پارے کہ اونا ادارہ ناجوڑ آتے بے معاوضہ غان درمان نا آسراتی فراوان کیک۔ صدر مملکت کینسر کیئرہاسپٹل اینڈ ریسرچ سینٹر لاہور نا کنڈآن کینسر نا ناجوڑآتے بے معاوضہ غان ددرمان نا آسراتی تا ستاءِ کرے۔
