اسلام آباد۔ 14ستمبر (اے پی پی) وزیراعظم نا ترجمان و خصوصی کمکار سیاسی ابلاغ ڈاکٹر شہباز گل پارینے کہ پروپیگنڈاکوئین ہرسہب اتون پوسکن ءُ دروغ اس تڑک، اینو بزغرآک شونہال ءُ ہرانا سوب آن کشت وکشار نا بشخ دُوارہ نت تیا سلنگ ءِ، خولم نا سپورٹ پرائس ءِ 23درسد ودفنگا۔ داخیال آتا درشانی ءِ او سے شنبے نادے آ مریم اورنگزیب نا بیان آ ردعمل اٹ کرے۔ ڈاکٹر شہبازگل پارے کہ پروپیگنڈا کوئین ہر سہب اتون پوسکن ءُ دروغ اس تڑک، نابود لیگ اینو بیرہ پروپیگنڈا لیگ اس جوڑ مسنے۔ اوپارے کہ مستین اٹ کشاری خودکفالت نا بھلو بھلو نعرہ خلنگا۔ نابود حکومت آک کشت وکشار نا شونداری کن ہچ ءُ کاریم اس کتور۔ شریف خاہوت نا مل آتا پیشن گنڈیری نا پیسہ خواہنگ آ بزغرآتیا لاٹھی چارج کننگاکہ۔ اوپارے کہ اینو بزغرآک شونہال ءُ ہرانا سوب آن کشت وکشار نا بشخ دُوارہ نت تیا سلنگ ءِ۔ داسال خولم، گنڈیری، کینو، برنج و پیماز، پٹاٹہ تون اوار چندی بمپر فصل ودی مسنے۔ بزغرآک داوار 3ہنداخہ پین و وخت آ اجرت ہلکر۔ ن لیگ 5سال اٹی سپورٹ پرائس نا مد اٹ اسہ روپئی اس ہم ودکی تتو۔ ڈاکٹر شہباز گل پارے کہ خولم نا سپورٹ پرائس ءِ 23درسد ودفنگا۔ ساڑی آ دور اٹی 500ارب روپئی خولم نا بزغرآتے ودکی ملانے۔
