اسلام آباد۔ 14ستمبر (اے پی پی) بنجائی وزیر تعلیم وکسبی تربیت شفقت محمود پارینے کہ جتا صوبہ غاک دہ و دُوانزدہ جماعت نا طالب علم آتا پروموشن پالیسی نا جتا فارمولہ طے کرینو، اسہ یونیفارم پروموشن پالیسی اس جوڑ کننگے۔ تدوک آ دے بنجائی وزیر تعلیم، کسبی تربیت و قومی میرات شفقت محمود نا کماشی ٹی 32می بین الصوبائی وزراتعلیم کانفرنس نا دیوان اس اڈہلک۔ دیوان اٹی غٹ صوبائی وزراتعلیم و تعلقدارسیکرٹریک بشخ ہلکر۔ ایگزیکٹو ڈائریکٹر ایچ ای سی، ڈی جی ایف جی ای آئی، چیئرمین آئی بی سی سی، ایم ڈی پنجاب ٹیکسٹ بک بورڈ، چیئرمین فیڈرل بورڈ و ایلو بڑزکو عہدیدارآک ہم دیوان اٹی بشخ ہلکر۔ بنجائی وزیر تعلیم شفقت محمود پارے کہ جتا صوبہ غاک دہ و دُوانزدہ جماعت نا طالب علم آتا پروموشن پالیسی نا جتا فارمولہ اس طے کرینو ہرانا سوب آن پروموشن پالیسی ٹی پرخ بننگ ءِ ہنداخاطرآن بین الصوبائی وزراتعلیم داہیت آ امنا کرے کہ اسہ یونیفارم پروموشن پالیسی اس جوڑ کننگے و امنائی وڑاٹ دا فیصلہ کننگا اختیاری مضمون آتا مارکس آتے کاؤنٹ کننگے، و کوویڈ۔ 19نا دین انا سوب آن اسکول آتا بند مننگ ءِ مون آ تخسا طالب علم آتے آسراتی تننگ کن فیصلہ کننگاکہ ہرامضمون اٹی طالب علم فیل مرے اوفتے ٹی 33درسد نمبر تننگے و ہنداوڑ ایوریج مارکس آتے کشنگک وخت اس کہ المی مضمون آتے ٹی 5درسد ودکی نمبرز تننگک۔ بین الصوبائی وزراتعلیم دا فیصلہ ہم کرے کہ بورڈ آف ٹیکنکل ایجوکیشن ہم طالب علم آتا پروموشن کن ہندا وڑوڈول ءِ کاریم اٹ اتیک۔ طالب علم آتے پریکٹیکل اٹ مارکس تننگ کن ہم جتا صوبہ غاک چندی وڑوڈول جوڑ کریسر، ہراڑآن گڑاس صوبہ غاتا طالب علم آتے نسخان و گڑاس صوبہ غاتا طالب علم آتے فائدہ مروئی ئسک پین دکہ گڑاس طالب علم جتا ذریعہ اٹ استادوپرنسپل آتیا اثرورسوخ ءِ کاریم اٹ اتسا زیات مارکس ہلنگ نا کوشست کیرہ۔ چیئرمین کمیٹی داوڑنا غٹ گڑتی تے چٹفنگ کن داڑکن ہم اسہ وڑ وڑوڈول اس جوڑ کننگ نا پارے و امنائی وڑاٹ دافیصلہ کننگاغٹ صوبہ غاک پریکٹیکل اٹ 50درسد گریس مارکس ایترہ و ایلو 50درسد تھیوری نا بنداوآ تننگک۔
