سیالکوٹ۔ 14ستمبر(اے پی پی) جمہوریہ انڈونیشیا نا سفیر ایڈم ایم توگیو پارینے کہ پاکستان و انڈونیشیانا نیام اٹ راجی، مذہبی و دودوربیدگی ہم آہنگی ءِ، پاکستان، انڈونیشیاآنبار ءِ، داجاگہ نا کن و خور، لویس و خاص وڑاٹ کیپ انڈونیشیا نا گیشتر علاقہ غاتا مخلوق بینِک۔ داہڑتوم آ ملک آک 2021اٹی آبادی نا رداٹ دنیا نا بھلا مسلم ملک مننگ والا ءُ۔ داملک آک تاریخ نااعتبار اٹ ہم بھاز مماثلت تخرہ۔ اوفتا نیام اٹ واپار ءِ مون آ دننگ مریک، خاص وڑاٹ سیالکوٹ اٹ تیار کروک آ مارشل آرٹ اسپورٹس گڈر، ہوزری تون اوار ایلو مصنوعات آتا انڈونیشیاٹی بھاز خواست ءِ۔ 2023ء پاکستان اٹی ساؤتھ ایشین گیمز مننگ والا ءِ۔ داگیمز تین پہ تینی تعلقداری و واپار نا مون آ دنگن اٹ اہم ءُ کڑد اس ادا کننگ کیک۔ پاکستان و انڈونیشیا قدرتی حسن آن شپ ءُ ملک ءُ۔ پاکستان نا گلیشئر بھاز زیبدار ءِ، داڑے ٹورازم نا بھلو وارخواہی اس ساڑی ءِ۔ انڈونیشیا 6درسد جی ڈی پی ٹورازم آن دوئی کیک۔ داخیال آتا درشانی ءِ او ایوان صنعت و واپار سیالکوٹ اٹ اڈہلوک دیوان آن تران کرسا کرے۔ داوخت آ صدر ایوان صنعت وواپار سیالکوٹ قیصراقبال، سینئر نائب صدر اسلم بٹ، نائب صدر انصر عزیز پوری، میاں نعیم جاوید، نوشین گیلانی، انیل سرفراز تون اوار صنعت کار و پوریاگر آتا بھلو کچ اس ساڑی ئسر۔
