اسلام آباد۔ 13ستمبر (اے پی پی) اوغانستان اٹی پوسکن آ حکومت نا جوڑ مننگ آن پد پی آئی اے نا اولیکو جہاز اسلام آباد آن کابل و پدی اسلام آباد آ سرمسنے۔ قومی ایئر لائن نا ترجمان عبداللہ خان نا کنڈآن جاری اعلامیہ نا رداٹ پی آئی اے نا بوئنگ 777جہاز پی کے 6249ہندی وخت انا رداٹ 9-45آاسلام آباد آن کابل آ سرمس و دوشنبے نا دے 12بجہ ءُ 2منٹ آ پدی اسلام آباد آ سرمس۔ پی آئی اے نا چیف آپریٹنگ آفیسر ایئر کموڈور جواد ظفر سی ای او پی آئی اے نا نمائندہ نا حیثیت اٹ تینٹ جہاز اٹی سوار ئسر۔ کابل ایئرپورٹ آ خذمت آتا بحالی کن اوغان سول ایوی ایشن و ہندی پی آئی اے نا عملہ خصوصی بست وبند کرینے۔ اوغانستان اٹی پاکستان نا سفیر منصور احمد خان و ایلو سفارتی عملہ نا داچرجوئی ٹی کوشست ستاکڑزک۔ تربیت یافتہ ایئر پورٹ عملہ ڈیوٹی ءِ جوائن کرسا جہاز ءِ ہینڈل کریر۔ کابل ایئرپورٹ آ پی آئی اے نا پن و جہاز نمبر خلوک ءِ۔ پی آئی اے نا عملہ جہانی صحافی تے کابل آ درے و جہانی بینک و جہانی خبررساں ادارہ غاتا ٹیم تے پدی ایس بس۔ کابل اٹ پوسکن آ حکومت نا جوڑ مننگ آن پد دااولیکو جہانی مسافر جہاز ئس۔ سی ای او پی آئی اے پارے کہ جہاز انا مسخت پاکستان و اوغانستان نا نیام اٹ خیرسگالی ءِ مون آ دننگ و انسانی ہمدردی نا بنداو تیا آپریشن ءِ سوگو کننگ ءِ۔ پی آئی اے و مچ آ دنیا کن داآپریشن بھاز اہم ءِ۔ ایئر مارشل ارشد ملک پارے کہ رابطہ غاتا بحالی کن غٹ ننا کنڈآ ہُننگ ءُ، اومیت ءِ زوت نن آپریشنءِ پورووڑاٹ بحال کننگ اٹ سرسہب مرینہ۔
