ملتان۔ 13ستمبر (اے پی پی) برصغیر نا عظیم روحانی پیشوا حضرت بہاؤالدین زکریا ملتانی 782می سالانہ عرس مبارک نا مسہ دے ئی دود آتا بنامس۔ کورونا دین انا سوب آن عرس انا دود آتے چنکو کچ اسے آ اڈتننگ انگ ءِ۔ وزیرخارجہ و سجادہ نشین مخدوم شاہ محمود قریشی حضرت بہاؤالدین زکریانا مزار ءِ بے شولسا عرس انا دودآتا بناءِ کرے۔ داوخت آ مخدوم زادہ زین قریشی، صوبائی وزیرتوانائی ڈاکٹر اخترملک، صوبائی وزیر مذہبی امورواوقاف سید سعید الحسن، خصوصی کمکار وزیراعلیٰ پنجاب حاجی جاوید اختر انصاری، ندیم قریشی، ضلعی انتظامیہ نا آفیسر وایلوفک ساڑی ئسر۔ مزار ءِ بے شولنگ آن پد دربارعالیہ نا سجادہ نشین مخدوم شاہ محمود قریشی ملکی سلامتی و سوگوی کن خصوصی دعا کرفسا پارے کہ نن دشمن تا سازش آتے بایدے پہہ مرین و اسٹ مرسا ننے داسازش آتا مقابلہ ءِ کروئی مریک۔ اوپارے کہ اللہ تعالیٰ پاکستان ءِ تہہ و پیشن نا سازش آتیان رکھے و خارانا بج ءِ دسوک آتا قلع قمع ءِ کے۔ اوپارے کہ ای اللہ تعالیٰ آن دعاکیوہ کہ داکان فرقہ واریت چٹے و ملک امن و آشتی نا وت اس جوڑ مرے۔ مخدوم شاہ محمود قریشی پارے کہ عرس انا دود آتے ٹی جماعت غوثیہ نا خذمت آک ہمیشہ پیش مریرہ و داعرس اٹ بھارت، کشمیر و ملک انا ہرچار آصوبہ غاتیان زائر آتا بھلو کچ اس بشخ ہلنگ خوائسکہ ولے کورونا دین انا حالیت آتا رداٹ فیصلہ کننگاکہ دود آتے محدود کننگے۔ ای غٹ بندغ آتا ایمان نا سلامتی، شونداری و شونہالی کن اللہ تعالیٰ آن دعاکیوہ۔ اوپارے کہ ای اللہ تعالیٰ آن دعاکیوہ کہ اواللہ نا ولی تا آستانہ غاتے تینا حفظ و امان اٹ تخے و دا انسانیت کن فیض و ہدایت نا ذریعہ مرساکیر۔ وزیرخارجہ پارے کہ عقیدہ غاتا شرف صوفی کرام تا تعلیمات آتا مرکزی نقطہ ءِ۔ اوزائر آتیا زور شاغا کہ او اتحاد بین المسلمین کن تینا کڑد ءِ ادا کیر۔ داوخت آ سیکورٹی نا سخت بست وبند کننگا۔
