اسلام آباد۔ 13ستمبر (اے پی پی) وزیراعظم نا خصوصی کمکار قومی جان جوڑی ڈاکٹر فیصل سلطان پارینے کہ کورونا غان بچفنگ نا ویکسین ہڑدے 10لکھ آن زیات بندغ آتے خلنگ انگ ءِ، دین آن بچنگ کن ماسک انا کاریم اٹ اتنگ بھاز المیءِ ولے داسکان نن دانا قابل متنون کہ ماسک انا کاریم اٹ اتنگ ءِ ہلن۔ داخیال آتا درشانی ءِ او جہانی ادارہ جان جوڑی نا شریداری اٹ ماسک بیننگ نا آگاہی مہم نا بنائی دود آن تران کرسا کرے۔ پاکستان اٹ کوویڈ۔ 19نا تالانی ءِ توننگ کن ننا حکمت عملی ءِ مچ آ دنیا ٹی امنا کننگا۔ اوپارے کہ کورونا دین اٹی پاکستان اٹی مثبت زرگزرانی گروتھ مون آ بس ہرا 3.5درسد ئس۔ اوپارے کہ دے اٹی ہڑدے دہ لکھ آن زیات ویکسین خلنگ انگ ءِ وخت اس کہ پنچ کروڑ آن زیات بندغ آتے داتم اسکان ویکسی نیشن کننگانے، و 6کروڑ 70لکھ خور تننگانے۔ اوپارے کہ اِراکروڑ آن زیات مخلوق پورو وڑاٹ ویکسین خلفینو، دااسہ گچین ءُ حکمت عملی اسے نا ڈیک ءِ، دین داسکان چٹتنے ومیڈیا نا کمک اٹ غٹ ءِ پاننگ خواوہ کہ دین داسکان ارے۔ داسکان ہمووخت بتنے کہ نم تینا ماسک آتے بینپبو، اینو نا دود انا مسخت ہم ہندادے کہ غٹ مخلوق ءِ داآگاہی تننگے کہ او ماسک ءِ المی کاریم اٹ اتیر، ویکسین خلفنگ آن پد ہم ماسک انا کاریم اٹ اتنگ، راجی فاصلہ ءِ برقرار تخنگ، دوتے وار وار آ صابون اٹ سلنگ المی ءِ تانکہ دادین ءِ تالانی آن توننگ مرے۔ اوپارے کہ اگہ نن داوڑ کینہ تو دین انا دا چارمیکو ریسہ غان ہم سرسہبی اٹ پیش تمنگ کینہ و ولدا نن نم داپاننگ نا قابل مرینہ کہ داسہ نمے ماسک انا کاریم اٹ اتنگ نا گرج اف ولے داسکان ہمووخت مر ءِ، غٹ آن خواست ءِ کہ ماسک ءِ کاریم اٹ اتیر۔ دادود انا اسہ مسخت اس داہم ارے کہ ڈبلیو ایچ او ادارہ غاتا سوگوی ٹی تینا کڑد ءِ ادا کننگ خواہک انتئے کہ ہراتم ادارہ غاک سوگو مریرہ تو اونا فائدہ بیرہ اسہ بندغ ءِ آخا بلکن مچ آ قوم و بروک آ چین تے مریک۔
