اسلام آباد۔ 13ستمبر (اے پی پی) بنجائی حکومت کراچی ٹی شونداری ڈٹ آتا بابت اولیتی بنداو تیا گام گیج کننگ ءِ، دا چرجوئی ٹی مچ آ کراچی ٹی ارب آ روپئی نا شونداری ڈٹ آتا جال اس تالان کرینے۔ وزارت ڈٹ بندی، شونداری و اصلاحات نا کمامدارآک پارینو کہ وزیراعظم عمران خان نا شونداری وژن نا رداٹ کراچی نا ٹرانسفارمیشن پلان آ کاریم بناکرینے انتئے کہ وزیراعظم کراچی نا حق اکن غٹ آن مست جہد نا ہیت ءِ کرے و ہندا سوچ انا رداٹ داشار انا شونداری ڈٹ آتا جال اس تالان کننگ انگ ءِ۔ کراچی ٹی بنجانا ڈٹ آتیا کاریم ترندی اٹ برجاءِ۔ کراچی نا نالہ غاتیان 11لکھ ٹن کچرا تے ہرفنگ انگ ءِ و نالہ غاتے ٹی 90درسد اسکان ڈریجنگ ءِ پورو کننگانے۔ نالہ غاتیا فٹ پاتھ، انڈرپاسزو اوورہیڈبریجزجوڑ مننگ ءِ و نالہ غاتا چارمہ کنڈ 15فٹ انا 60کلومیٹر مریس سڑک جوڑ کننگ انگ ءِ۔ ہنداوڑ کراچی ٹی 55آن 60کلومیٹر اسکان پوسکن آ سڑک آتیان بیدس کراچی سرکلر ریلوائی ہرا 83کلومیٹرآ تالان ءِ ہراڑآن چار ءُ نیم لکھ مسافر فائدہ ہرفرہ ہم کراچی ٹرانسفارمیشن پلان نا اہم ءُ بشخ اسے۔ بنجائی حکومت کراچی کن 10ارب روپئی نا ویکسین فراوان کرینے۔
