کراچی۔11ستمبر (اے پی پی): بنجاھی وزیر برائے منصوبگ بندی، دیمروئی ءُ گہتری کار ءُ گامگیج اسد عمر ءَ گوشت کہ عمران خان 2023 ءَ اولی مردم بیت کہ آ دومی واریگ ءَ ملک ءِ مزن وزیر گچین بیت، پاکستان ءِ معاشی آیوکیں باندات ایکسپورٹ ءِ گوما بندوک انت ءُ معاشی آیوکیں باندات مئے راجی سلامتی ءِ گوما بندوک انت، ٹوھیں منصوبگ آنی واستہ منصوبگ بندی کنگ ءَ وھد لگ ایت بلے نوں زمین ءِ سر ءَ کار سہرا بوھگ ءَ انت، دمک، کوچگ، سڑک، نالی جوڑ کنگ بنجاھ ءِ زمہ واری نہ انت بلے کراچی ءِ ارزشت ءِ رد ءَ بنجاھ ءَ ایشی ءِ واستہ 21 ارب کلدار گیشینتگ انت۔ ٹوھیں منصوبگ آں ابید بنجاھ ءَ پیسلہ کتگ کہ کراچی ءِ شہری آنی ٹپ ءُ زیم آناں دوا ءُ درمان ءِ واستہ اے کسانیں کار ھم کنگ بنت۔ اے ھیالانی درشانی آئی ءَ شمبے ءِ روچ ءَ بنجاھی زرئی کارانی وزیر علی زیدی ءِ ھمبراھی ءَ کراچی پورٹ ٹرسٹ (کے پی ٹی) پورٹ گس ءَ کراچی پیکج ءِ چیر دستی ءَ بنجاھی منصوبگ آنی ھوالگ ءَ برجم داشتگیں پریس کانفرنس ءَ گوں گشتانک ءِ ساھت ءَ تران کنان ءَ کت۔
