اسلام آباد۔ 10ستمبر (اے پی پی) چیئرمین کشمیر کمیٹی شہریارخان آفریدی کمیٹی نا باسک، کنوینر حریت راہشون سید فیض نقشبندی و کل پارٹیز حریت کانفرنس نا سرکڑدہ غاتون اوار اقوام متحدہ نا فوجی مبصر مشن ءِ یات داشت پیش کرے۔ یات داشت اٹ اقوام متحدہ نا سیکرٹری جنرل و اقوام متحدہ نا ہائی کمشنر انسانی حقءِ بابائے حریت کشمیر سید علی گیلانی نا زیر حراست خون نا دمدستی جاست وپاست نا خواست کننگا۔ داوخت آ میڈیا ءِ حوال ترسا شہریار آفریدی پارے کہ کنتون سینیٹر سرفراز بگٹی و حریت راہشون یات داشت پیش کننگ کن ہنار۔ اقوام متحدہ مبصرآتے سید علی گیلانی نا بابت یات داشت پیش کرے۔ اوپارے کہ بھارت مقبوضہ کشمیر اٹی ٹارگٹ کلنگ کننگ ءِ، حریت راہشون تے زندان تیٹی بند کرینے، ورناتے زندان تیٹی شاغسا خاہوت نا زند ءِ مشکل کیک، سید علی گیلانی نا میت ءِ پلسا انسانیت نا توہین ءِ کننگا، بھارت ظلم آ دنیا ءِ معلومدار کننگ اُن۔ اوپارے کہ شاہ محمود قریشی ہم چٹھی نوشتہ کرینے، مچ آ قوم کشمیر نا بابت متفق ءُ نن کمیٹی ٹی قرارداد منظور کرین ہراداڑے اقوام متحدہ مبصرآتے تسن۔ داوخت آ سینیٹر سرفراز بگٹی پارے کہ ہندوستان ظلم انا بازار ءِ گرم کرینے۔ سرفراز بگٹی پارے کہ مچ آپاکستانی پارلیمنٹ کشمیر ظلم آ اسہ توار ءُ۔ کورونا دین اٹی دنیا تینا مخلوق ءِ پروٹیکٹ کرے بھارت رزاک اٹ زندان تیٹی کورونا دین ءِ تالان کرے۔
