اسلام آباد۔ 10ستمبر (اے پی پی) وزیرخارجہ مخدوم شاہ محمود قریشی پارینے کہ جہانی برادری ءِ اوغانستان اٹی انسانی تنکی نا گڑتی تون مون تننگ کن اوغانستان نا انسانی بنداو تیا دمدستی امداد ءِ پک کروئی مریک۔ اوداہیت ءِ پاکستان و اسپین نا نیام اٹ ڈل آتا کہول آ مذاکرات اٹی پارے ہراجمعہ نادے آ وزارت خارجہ ٹی اڈہلک۔ پاکستانی ڈل انا کماشی ءِ وزیرخارجہ مخدوم شاہ محمود قریشی وخت اس کہ اسپین ڈل انا کماشی ءِ اونا ہم منصب جوزے البرس کریکہ۔ دفترخارجہ نا رداٹ وزیرخارجہ پارے کہ پاکستان و اسپین نا نیام اٹ ہڑتوم آ کنڈآتا تعلقداری ءِ۔ اسپین، یورپی یونین نا اہم ءُ ملک اس مننگ نا ناطہ ہم ننکن خاص اہمیت تخک۔ شاہ محمود قریشی پارے کہ اوغانستان نا بابت خلوک آغٹ کساس آک غلط مسر، اوغانستان اٹی ساڑی آ بدلی ٹی ہراخانہ جنگی نا گڑتی ظاہر کننگاکہ او بظاہر چٹانے وخت اس کہ طالبان تا کنڈآ ن، عام معافی، اوغان تا حق انا رکھ انا بابت مون آ بروک آ بنائی بیانک حوصلہ افزاءُ۔ وزیر خارجہ پارے کہ پاکستان، اوغان امن عمل اٹ پبی خیرخواہی نا کڑد ءِ ادا کرے، چار دہائی آن پد اوغانستان اٹی امن نا اومیت ودی مسنے ہرادے گوہنگپ، دانازرک مرحلہ غا اگہ سہی فیصلہ کننگتو و اوغانستان ءِ تنیا اِلنگا تو اونا شدید مضمرات مریک، مخدوم شاہ محمود قریشی پارے کہ نن امنا کرین کہ اوغانستان نا ہمسایہ ملک آتے آخبت کن امنائی لائحہ عمل اس تینا کننگ نا گرج ءِ۔ اوپارے کہ پاکستان 30آن زیات ملک آتا 12ہزار بندغ آتے کابل آن رکھ کشنگ اٹ کمک فراوان کرے۔ اسپین نا وزیر خارجہ جم وجوش اٹ بخیر کننگ آ وزیرخارجہ مخدوم شاہ محمود قریشی نا منت واری ءِ ہرفے و اسپین اٹ رہینگوک آ پاکستانی کمیونٹی نا مثبت کڑد انا ستاءِ کرے۔ ہڑتوم آ وزیرخارجہ غاک پاکستان و اسپین نا نیام اٹ سیاسی سلابتی میکنزم ءِ پین فعال کننگ نا عزم انادرشانی ءِ کریر۔
