اقوام متحدہ۔ 10ستمبر (اے پی پی) پاکستان زور شاغانے کہ اوغانستان اٹی انسانی حالیت آک سنگین ءُ، ہنداخاطرآن جہانی برادری پوسکن آ بدلی آ امنائی نقطہ نظر اس تینا کے و ملک اٹ امن و سوگوی نا بحالی ٹی کمک کے انتئے کہ مسابقتی و غیر متفقہ نقطہ نظر آن اوغانستان و مچ آ ڈیہہ ٹی امن و سوگوی نا مون آدننگ و شونہالی نا وارخواہی تے نسخان رسینگک۔ اوتدوک آ دے اقوام متحدہ نا سلامتی کونسل اٹ اوغانستان حالیت آتیا شرہ ٹی آئر لینڈہرا ستمبر نا تُو اکن سلامتی کونسل نا صدر ءِ نا منت واری ءِ ہرفے ہرا اوغانستان نا حالیت آتیا پاکستان و ایلو ہمسایہ ملک آتا شرکت ءِ پک کرینے وخت اس کہ اوڑآن چپ اگست اٹ بھارت سلامتی کونسل نا کماشی ٹی اوغانستان آ کونسل نا دیوان آتے ٹی پاکستان نا بشخ ہلنگ نا درخواست آتے مسترد کریسس۔ پاکستانی مندوب منیر اکرم پارے کہ کورونا نا دین، بے چیٹی و مستین نا حکومت آتا بے سہبی و کرپشن نا سوب آن اوغانستان اٹی انسانی حالیت آک خوفناک ءُ ہراڑے اسہ کروڑ 80لکھ بندغ ءِ دمدستی کمک نا گرج ءِ ہنداخاطرآن ننے اوغانستان نا حالیت آتے پین بدترین مننگ آن توروئی مریک۔ ہراڑآن مہاجرآتا تنکی ودی مننگ کیک و امن و سوگوی ءِ مشکل جوڑ کننگ کیک۔ اوداچرجوئی ٹی اوغانستان اٹی اقوام متحدہ نا کمکی مشن نا سروک و اقوام متحدہ نا خصوصی نمائندہ ڈیبورالیونز نا داخواست انا مخ تفی ءِ کرے ہراٹی اوع اوغانستان کن اونا مالی وسیلہ اسکان رسینگ نا خواست کرینے۔ پاکستانی مندوب پارے کہ مالی وسیلہ اسکان رسینگ اوغانستان اٹ زرگزرانی حالیت آتے پین خراب مننگ آن توننگ کن المی ءِ۔ او اقوام متحدہ نا سیکرٹری جنرل انتونیوگوتریش نا 13ستمبرآ جنیوا ٹی جہانی کمکی کانفرنس نا اڈتننگ نا گام انا ہم ستاءِ کرے و زورشاغا کہ جہانی برادری است انا حب اٹ کمک کے انتئے کہ اوغانستان اینو تینا تاریخ نا نازرک موڑآ سلوک ءِ و اوغان الس جہانی برادری نا کمک اٹ بحالی امن و شونداری نا گمان تے زندہ کننگ کیک۔
