اسلام آباد۔ 10ستمبر (اے پی پی) اسپین نا وزیر خارجہ جوزمینوئل البرس جمعہ نادے آ اسلام آباد آ سرمس۔ وزارت خارجہ غا بننگ آ وزیرخارجہ مخدوم شاہ محمود قریشی شرفمند آمہمان ءِ بخیر کرے۔ اسپین نا وزیرخارجہ وزارت خارجہ نا سوزہ زار اٹی یات گاری نیال اس خلک۔ ہڑتوم آ وزیرخارجہ غاتا نیام اٹ، وزارت خارجہ ٹی، ڈل آتا کہول آمذاکرات مریک، مذاکرات اٹی اوغانستان نا تازہ انگا حالیت آتیا گپ وتران کننگک۔ دامذاکرات اٹی ہڑتوم آ کنڈآتا تعلقداری نا چندی جہت آتیاہم سرجم گپ وتران مریک۔ پاکستان و اسپین، یورپی یونین و کثیر الجہتی فورم تیا خوشگوار تعلقداری تخرہ۔ اسپین یورپی یونین اٹ پاکستان نا مسٹ میکو بھلا واپاری شریدار ءِ۔ اسپین یورپ نا ہموملک آتے ٹی اوار ءِ ہراڑے پاکستانی تا بھلو کچ اس رہینگ انگ ءِ۔ اومیتءِ کہ وزیرخارجہ جوزمینوئل البرس نا دورہ علاقائی و جہانی ویل آتیا تین پہ تینی ہم آہنگی و ہڑتوم آ کنڈآتا خڑکی کمکاری ءِ سوگو کننگ اٹ کمکار مریک۔
