اسلام آباد۔ 10ستمبر (اے پی پی) وزیرخارجہ مخدوم شاہ محمودقریشی پارینے کہ اوغانستان کن وسیلہ غاتا دوئی کننگ ءِ ممکن کننگے، اوغانستان نا فنڈ آتا انجماد فائدہ ئی مفک۔ جہانی برادری ءِ اوغانستان ءِ مالی تنکی آن بچفنگ و کمکاری کن مون آ بننگ ناگرج ءِ۔ جمعہ نا دے آ ڈل آتا کہول آ مذاکرات آن پد اسپین نا تینا ہم منصب جوزے البرس تون اوار وزارت خارجہ ٹی اسیجائی پریس کانفرنس آن تران کرسا وزیرخارجہ پارے کہ پاکستان و اسپین نا نیام اٹ ہڑتوم آ کنڈآتا تعلقداری ءِ۔ اوپارے کہ ای اسپین نا وزیر خارجہ ءِ اوغانستان نا ساڑی آ حالیت آتیا پاکستان نا نقطہ نظرآن معلومدار کریٹ۔ اوغانستان نا بابت پاکستان واسپین نا نقطہ نظراسٹ ءِ۔ ہڑتوم آ ملک آک پرامن، سوگو وشونہال اوغانستان نا خواہندار ءُ ولے سوج دادے کہ دامسخت آتا دوئی کننگ کن امر ممکن مرے؟ شاہ محمود قریشی پارے کہ اسپائلرآک دوحہ ٹی بین الاوغان مذاکرات ءِ گڈیکو نتیجہ اسکان سرمننگ کن الیتوس، اگہ بین الاوغان مذاکرات نتیجہ خیز پک مسکہ تو حالیت آک جتا مسرہ۔ دنیا ءِ اوغانستان اٹی پوسکن آ حقیقت ءِ سمجھنگ نا گرج ءِ۔ شاہ محمود قریشی پارے کہ جہانی برادری ءِ اوغانستان نا کمکاری کن مون آ بروئی مریک۔ ساڑی آ حالیت آتے ٹی اوغانستان ءِ تنیا ہلنگ نا مضمرآک شدید وڑنا مننگ کیرہ، ننے اوغانستان نا کنڈآن مثبت رویہ نا است بڈی ءِ کروئی مرے۔ شاہ محمود قریشی پارے کہ درو کابل آن 200بندغ آتے ہرفسا اسہ جہاز اس دوحہ آ سرمس۔ اوغانستان آن پدی بننگ ناخواہندار بندغ آتا رکھ پیش تمنگ جہانی برادری نا است خواہی تا رداٹ ءِ۔ پاکستان، اوغانستان نا کمکاری ءِ برجاتخانے، درو، ننا اسہ جہاز اس خور و دوائی ہرفسا کابل آ سرمس، نن تینا کچ اٹنگا وسیلہ غاتیان پد ہم ہوائی و ڈغاری کسرتے اٹ اوغان ایلم تا انسانی بنداوتیا کمکاری ءِ برجاتخنہ۔ اوپارے کہ اوغانستان نا زرگزرنی تنکی کس اسے نا فائدہ ٹی اف، گرج داہیت انا ءِ کہ اوغانستان کن وسیلہ غاتا دوئی کننگ ءِ ممکن کننگے۔ شاہ محمود قریشی پارے کہ ای فیٹف نا بابت پاکستان نا کنڈآن کروک آ پبی عملی گام گیج آتیان معلومدار کریٹ و جی ایس پی پلس اسٹیٹس نا بابت اسپین نا کنڈآن پاکستان نا پدریسہ مخ تفی آ اسپین نا وزیرخارجہ نا منت واری ءِ ہرفیٹ۔ نن پاکستان و اسپین نا نیام اٹ پنچ می سالانہ سلابتی دیوان ءِ زوت اڈتننگ نا خواہندار اُن۔ اسپین کن پاکستان اٹ زرکاری نا گچین ءُ وارخواہی ارے۔ پاکستان نا گچین حالیت آتے مون آ تخسا بھاز انگا ملک آک ٹریول ایڈوائزری آ نظرثانی کرینو۔ ای ہندا رداٹ، اسپین نا وزیرخارجہ تون پاکستان نابابت ٹریول ایڈوائزری آ نظرثانی کننگ نا خواست کرینٹ۔
