اسلام آباد۔ 10ستمبر (اے پی پی) بنجائی وزیر حوالکاری و شینکاری چوہدری فواد حسین پارینے کہ ساڑی آتنکی ٹی اوغان الس ءِ تنیا الیپنہ، اوغانستان اسکان رسینگ کن پاکستان اہم کوریڈور ءِ، نن کوشست کننگ اُن کہ اوغانستان اٹی انسانی المیہ ودی مف۔ پاکستان انسانی ہمدردی نا بنداو آ اوغان الس نا ہرممکن کمک ءِ کیک، سد آ صحافی کابل اٹی اختہ ئسر ہرافتے کابل آن کشنگ اٹ کمک فراوان کرین۔ پاکستان و کیوبا نا نیوز ایجنسی تا نیام اٹ خبرآتا ہل و تس آن ہڑتوم آ ملک آتا تعلقداری پین سوگو مریک، پاکستان کیوبا تون تینا تعلقداری تے قدر انا نظراٹ ہرک۔ داخیال آتا درشانی ءِ او جمعہ نادے آ داڑے پاکستان نا قومی نیوز ایجنسی ایسوسی ایٹڈ پریس آف پاکستان(اے پی پی) و کیوبا نا نیوز ایجنسی پرسینا لیٹینا نا نیام اٹ مفاہمت نا یات داشت آ دستخط آتا دود آن تران کرسا کرے۔ بنجائی وزیر حوالکاری چوہدری فوا دحسین پارے کہ اینو اسہ اہم وتاریخی ءُ دے اسے، کیوبا و پاکستان نانیوز ایجنسی تا نیام اٹ خبرآتا ہل و تس آن ہڑتوم آ ملک آتا تعلقداری پین سوگومریک۔ اوہڑتوم آ خبررساں ادارہ غاتے مفاہمت نا یات داشت آ دستخط کننگ آ مبارکبادی ترسا پارے کہ ہڑتوم آ ملک آک اسہ ایلو ءِ مون تروک ویل و چیلنج آتے جوانی اٹ پہہ مریرہ۔ اوپارے کہ پاکستان کیوبا تون تعلقداری تے قدر انا نظراٹ ہرک ہرا تین پہ تینی پت، شرف و متکن آ سنگتی آٹی ءُ۔ چوہدری فواد حسین پارے کہ وزارت حوالکاری نا ایکسٹرنل پبلسٹی ونگ ءِ پوسکن آ دور انا خواست آتا رداٹ ہم گرنچ کننگانے۔ ایکسٹرنل پبلسٹی ونگ اوغانستان اٹی داتم اسکان درملکی میڈیا ءِ 250ویزہ و 85بارڈرکراسنگ این اوسی جاری کرے۔ اوپارے کہ سد آ صحافی کابل اٹی اختہ ئسر ہرافتے کشنگ اٹ کمک فراوان کننگا۔ بنجائی وزیر حوالکاری پارے کہ کابل آن درملکی میڈیا نا بندغ آتے کشنگ نا کوشست آتے ٹی کابل اٹی ساڑی ننا سفارتی عملہ بھلو خذمت اس سرتس۔ ننا داکوشست آتا جہانی میڈیا غا ستاءِ کننگ انگ ءِ۔ چوہدری فواد حسین پارے کہ پاکستان انسانی ہمدردی نا بنداو آ اوغان الس ءِ ہرممکن کمک فراوان کیک۔ ساڑی آ تنکی ٹی اوغان الس ءِ تنیا الیپنیہ۔ اوپارے کہ اوغانستان اسکان رسینگ کن پاکستان اہم ءُ کوریڈور اسے۔ وزیراعظم نا پارت آتا رداٹ حکومت و وزارت حوالکاری اوغانستان آن درملکی شاری تا کشنگ اٹ پبی کمک کننگ ءِ، داوخت آ ننا اسہ سی ون تھرٹی جہاز اس کابل اٹی ءِ۔ اوپارے کہ نن کوشست کننگ اُن کہ اوغانستان اٹی انسانی المیہ ودی مف۔ دودآن تران کرسا کیوبا نا سفیر زینیئر جیویئر کیرو گونزیلز پارے کہ جعلی نیوز انا ویل کیوباءِ ہم مون تروک ءِ۔ اے پی پی تون خبرآتا ہل و تس آن ہڑتوم آ ملک آتا نیام اٹ حوالکاری نا بشخ اٹ تعلقداری پین سوگو مریک۔ اوکابل آن درملکی شاری تا کشنگ اٹ کمک کننگ آ پاکستان نا منتواری ءِ ہرفسا پارے کہ اوغان الس کن خور ودوائی تا چرجوئی نا بناءِ کننگ ستاکڑزک۔ مفاہمت نا یات داشت آ کیوبا نا سفیر زینئر جیویئر کیرو گونزیلز و قومی خبررساں ادارہ ایسوسی ایٹڈ پریس آف پاکستان نا منیجنگ ڈائریکٹر مبشر حسن دستخط کریر۔ داوخت آ سیکرٹری حوالکاری شاہیرہ شاہد و وزارت نا ایلو بڑزکو آفیسر آک ہم ساڑی ئسر۔
