اسلام آباد۔ 10ستمبر(اے پی پی) وزیراعظم عمران خان پارینے کہ حکومت برآمد کروک آتے کن آسانی ودی کننگ ءِ، درآمد و برآمد آتا نیام اٹ مروک آ پرخ ءِ کم کننگ کن ہلہلہ ئی گام گیج کننگ نا سخت گرج ءِ، کاروباری برادری ءِ موافق فضا و کاروبار دوست پالیسی تا فراوانی حکومت نا اولیت ءِ۔ داخیال آتا درشانی ءِ او جمعہ نادے آ تینا کماشی ٹی ملکی برآمد آتا کچ ءِ ودفنگ کن حکومت نا کنڈآن کروک آ چندی گام گیج آتا بابت جاچ دیوان آن تران کرسا کرے۔ دیوان اٹی قومی سلامتی نا سلاہکار ڈاکٹر معید یوسف، خصوصی کمکار ڈاکٹر شہبازگل، کامرس ڈویژن و توانائی ڈویژن نا سیکرٹری صاحب آک و سینئر کارندہ غاک بشخ ہلکر۔ دیوان ءِ پاننگاکہ پاکستان نا ساڑی آ برآمدآتا کچ اٹی جم وڑاٹ 30ارب ڈالر نا ودکی مننگ کیک۔ برآمد آتے ودفنگ نا رداٹ ممکنہ وڑاٹ آئی ٹی، ٹیکسٹائل، دوائی، پولٹری، برنج، سوزی و میوہ، سل، بے، سنگ مرمر، سرامکس و سرجیکل ازباب آتون اوار 19مصنوعات آتیا چکار کننگ نا گرج ءِ۔ کامرس ڈویژن معلومدار کرے کہ غٹ شریدار بشمول صنعت کار، برآمد کروک و تعلقدار سرکاری ادارہ غاتون سلابت نا عمل برجاءِ۔ وزیراعظم داہیت آ زور شاغا کہ غٹ زرگزرانی ٹک آک مثبت کنڈآ ہِننگ ءُ ولے درآمد و برآمد آتا نیام اٹ مروک آ پرخ ءِ کم کننگ کن ہلہلہ ئی گام گیج کننگ نا گرج ءِ۔ حکومت برآمد کروک آتے کن آسانی ودی کننگ ءِ۔ وزیراعظم نا کامرس ڈویژن ءِ پارت کرے کہ غیر ملک آتے ٹی تعینات پاکستان نا ٹریڈ اینڈ انویسٹمنٹ آفیسر آتے کن ہدف متعین کننگے۔ اوپارے کہ کامرس ڈویژن بروک آ اِراہفتہ ٹی اسٹریٹجک ایکسپورٹ فریم ورک منظوری کن پیش کے۔ وزیراعظم پارے کہ پاکستانی برآمد آتے ٹی ودکی نا رداٹ مارکیٹ و مصنوعات آتے ٹی تنوع اتنگ ساڑی حکومت نا اولیت ءِ۔ وزیراعظم پارے کہ پاکستانی کاروباری برادری ٹی بے شمار پوٹینشل ساڑی ءِ۔ کاروباری برادری ءِ موافق فضا وکاروبار دوست پالیسی تا فراوانی حکومت نا اولیت ءِ۔ اوپارے کہ حکومت کاروباری برادری نا سلابت اٹ پالیسی تا ٹہیفنگ نا فلسفہ غا عمل کننگ ءِ و حکومت و انڈسٹری نا سوگو پارٹنر شپ انا چرجوئی برجاسلک۔ اوپارے کہ ہراڑے اسہ کنڈآ حکومت کاروباری برادری ءِ ہرممکنہ آسراتی فراوان کننگ نا پالیسی آ سختی اٹ عمل کننگ ءِ ہموڑے حکومت کاروباری برادری آن اومیت کیک کہ او داوارخواہی تا پبی فائدہ ہرفر و ملکی زرگزران ناسوگوی ٹی حکومت تون پبی تفر۔
