اسلام آباد۔10ستمبر (اے پی پی): بنجاھی وزیر اھوالکاری ءُ شنگ کاری چوہدری فواد حسین ءَ گوشت کہ استیں ڈکال ءَ الس ءَ را ایوک یل نہ کناں، اوگانستان ءَ تاں رسائی ءِ واستہ پاکستان ارزشتی ایں کوریڈور ات، ما کوشست کنگ ءَ آں کہ اوگانستان ءَ بنی آدمی ڈکال مہ بیت، پاکستان بنی آدم دوستی ءِ بنیات ءَ اوگان الس ءِ ھمک رنگیں کمک کنت، سد آنی اھوالکار کابل ءَ پستگ انت ایشاناں کابل ءَ چہ ڈکال ءَ کمک پجاری کت۔ پاکستان ءُ کیوبا ءِ نیوز ایجنسی ءِ نیام ءَ نیوز آنی دیگ ءُ زورگ ءَ چہ دوئیں ملک آںی یکوئی گیش برجم بنت، پاکستان کیوبا ءِ گوما وتی یکوئی آناں شرپ ءُ ازت دنت۔ اے ھیالانی درشانی آئی ءَ آدینگ ءِ روچ ءَ ادا پاکستان ءِ راجی نیوز ایجنسی ایسوسی ایٹڈ پریس آف پاکستان (اے پی پی) ءُ کیوبا ءِ نیوز ایجنسی پرسینا لیٹینا ءِ نیام ءَ تپاک نامہ ءِ سر ءَ دست چنگل جنگ ءِ مراگش ءَ گوں گشتانک دیان ءَ کت۔
بنجاھی وزیر اھوالکاری چوہدری فواد حسین ءَ گوشت کہ مرچی یک ارزشتی ایں ءُ راجدپتری روچ ات، کیوبا ءُ پاکستان ءِ نیوز ایجنسی آنی نیام ءَ ھال آنی دیگ ءُ زورگ ءَ چہ دوئیں ملک آنی یکوئی گیش برجم بنت۔ آئی ءَ دوئیں ھال رسانکی در آناں تپاک نامہ آنی سر ءَ دست چنگل جنگ ءِ پد ءَ مبارک بات پیش کنان ءَ گوشت کہ دوئیں ملک یک ءِ دومیگ ءِ جیڈھ آناں جوانی ءَ گوں پھم انت۔ آئی ءَ گوشت کہ پاکستان کیوبا ءِ گوما یکوئی آناں شرپ ءُ ازت دنت، وت مہ وتی ، یکیم ءُ شرپ ءُ کوھنیں دوستی ءِ رد ءَ انت۔
چوہدری فواد حسین ءَ گوشت کہ وزارت ءِ اھوالکاری ءِ ایکسٹرنل پبلسٹی ونگ ءِ نوکیں زمانگ ءِ رد ءَ ھمگام کنگ بوتگ۔ ایکسٹرنل پبلسٹی ونگ ءَ اوگانستان ءَ انوگ ءَ تاں در ملکی میڈیا ءَ را 250 ویزہ ءُ 85 بارڈر کراسنگ این او سیز جاڑی کت۔ آئی ءَ گوشت کہ سدانی کساس ءَ اھوالکار کابل ءَ پستگ انت آوانی در کنگ ءَ چہ کمک پجاری کتگ۔ بنجاھی وزیر اھوالکاری ءَ گوشت کہ کابل ءَ چہ در ملکی میڈیا ءِ مردم آناں در کنگ ءِ کوشست آنی تہ ءَ کابل ءَ استیں مئے سفارتی کارندہ آں گران بھائیں ازمت پیلو کتگ، مئے اے کوشست آناں میاں اوستمانی تک ءَ سہراھگ بوھگ ءَ انت۔ وت مہ وتی تپاک نامہ ءِ سر ءَ کیوبا ءِ سفیر زینئر جیویئر کیرو گونزیلز ءُ راجی ھال رسانکی ادارگ ایسوسی ایٹڈ پریس آف پاکستان ءِ منیجنگ ڈائریکٹر مبشر حسن ءَ دست چنگل جت۔ اے موہ ءِ سر ءَ سیکریٹری اھوالکاری شاہیرہ شاہد ءُ وزارت ءِ ایندگر اپسرگ ھم ساڑی اتنت۔
