اسلام آباد۔ 09ستمبر (اے پی پی) وزیراعظم نا ترجمان و خصوصی کمکار ڈاکٹر شہبازگل پارینے کہ سینٹرل بزنس ڈسٹرکٹ لاہور نا پنچ پلاٹ آتا نیلامی آن پنجاب حکومتءِ21ءُ نیم ارب روپئی نا کٹیا مسنے، دا ڈٹ بیدس وام آن بناکننگ انگ ءِ، داڑآن 1500ار ب روپئی کٹیا مریک، دونیم لکھ روزگار نا پوسکن ءُ وارخواہی ودی مریک، بڑزنگا ماڑی تا بابت پالیسی نازوت پڑو ءِ کننگک۔ داخیال آتا درشانی ءِ او پنچ شنبے نادے آ راوی اربن ڈویلپمنٹ اتھارٹی نا چیف ایگزیکٹو آفیسر عمران امین تون اوار پریس کانفرنس آن تران کرسا کرے۔ ڈاکٹر شہباز گل پارے کہ سینٹرل بزنس ڈسٹرکٹ و راوی ریور پروجیکٹ ساڑی آ حکومت نا ڈٹ ءِ۔ دا السی فائدہ نا ہیت اسے۔ سینٹرل بزنس ڈسٹرکٹ نا بابت اخبار آتے کروڑ آ روپئی نا اشتہار تننگانے۔ اوپارے کہ لاہور اٹی پاکستان نا تاریخ نا اولیکو سینٹرل بزنس ڈسٹرکٹ جوڑ مننگ ءِ۔ تدوک آ منہ تُوآن داڑآ کاریم برجاءِ۔ وزیراعظم عمران خان جندی وڑاٹ داڈٹ اناچاروکی ءِ کننگ ءِ۔ اوپارے کہ داڈٹ آ عملی کاریم بناکرینے۔ دا ڈٹ 1600ایکڑآ لاہور نا پرائم لینڈ کٹرآ تالان ءِ۔ اوپارے کہ سینٹرل بزنس ڈسٹرکٹ نا پنچ پلاٹ آتا نیلامی مسنے۔ نیلامی ٹی ترکی نا غٹ آن بھلا کمپنی بگ ارٹر تون اوار 5کمپنی سرسہبی دوئی کرینو۔ دا42کروڑ فی کنال نیلامی کننگانے۔ دانیلامی ٹی 21.58ارب نا پنجاب حکومت ءِ کٹیا مسنے۔ داڑے گڑاس ہور تے سرفسا پاریرہ کہ نن ارب آتا بچت کرین۔ دامش تے وزیراعظم عمران خان دوخلکونے ہنداخاطرآن فائدہ بسنے۔ وزیراعظم عمران خان الس نافائدہ ٹی ہرا مش اٹ دوشاغک تو خیسن جوڑ مریک۔ اوپارے کہ مستین اٹ الس ءِ میٹرو بس و اورنج ٹرین تننگا ہراڑآ 2سالانہ 12ارب روپئی سبسڈی تننگ انگ ءِ وخت اس کہ وام تا قسط آتے جتا ادا کروئی تمک۔ اوپارے کہ ہراڈٹ انا نن بناءِ کننگ اُن او پبلک پرائیویٹ پارٹنر شپ انا رداٹ سرکاری ڈغارتیا بناکننگ انگ ءِ۔ نن الس ءِ ٹیکہ خلپننگ اُن۔ خصوصی کمکار پارے کہ سنٹرل بزنس ڈسٹرکٹ بیدس وام آن بناکننگ انگ ءِ و داڑآن 1500ارب روپئی کٹیا مریک و 2لکھ 50ہزار مخلوق ءِ نوکری ملک۔ لاہور نا تہہ ٹی کچٹی نا مون ءِ توننگ اٹ ہم کمک رسینگک۔ ڈاکٹر شہبازگل پارے کہ فیصل آباد، ملتان و راولپنڈی ٹی سینٹرل بزنس ڈسٹرکٹ جوڑ کننگک۔
