اسلام آباد۔ 09ستمبر (اے پی پی) وزیراعظم پاکستان و بنجائی وزیر حوالکاری و شینکاری نا پارت آتے مون آتخسا، تینا جہانی زمواری تا درک ءِ خلسا وزارت حوالکاری و شینکاری نا ایکسٹرنل پبلسٹی ونگ تدوک آ تُو آن داتم اسکان درملکی میڈیا ءِ 250ویزہ و 85بارڈر کراسنگ این او سی جاری کرے، ای پی ونگ ءِ داوخت اٹی میڈیا کوریج نا 35درخواست دوئی مس۔ ای پی ونگ نا کنڈآن پنچ شنبے نادے آ جاری کروک بیان نا رداٹ سول و فوجی سرکڑدہ غاتون گپ وتران کننگ و اوکان پد طورخم بارڈر نا دورہ کننگ کن یورپ و بھارت نا بڑزکو کہولی میڈیا ڈل آتے بٹنگا۔ بیان اٹی مستی پاننگانے کہ اوغانستان اٹی رہینگوک آ درملکی صحافی تا پیش تمنگ یا اوغانستان اٹی میڈیا کوریج نا است خواہ صحافی تے ویزہ آسراتی فراوان کننگ کن ایکسٹرنل پبلسٹی ونگ اٹ جوڑ”درملکی میڈیا کن خصوصی آسراتی ڈیسک“ 24گھنٹہ کاریم کننگ ءِ۔ ای پی ونگ ءِ لندن، برلن، بیجنگ، واشنگٹن، اوٹاوا، برسلز، پیرس، سئیول، ماسکو، دوحہ، میڈرڈ، نیویارک، دی ہیگ، اسٹاک ہوم، بینکاک، قاہرہ، دوبئی، نئی دہلی و ایلو ملک آتیان اوغانستان اٹی کراسنگ، کوریج و ٹرانزٹ کن سد آ درخواست دوئی مس۔
