قاہرہ۔ 09ستمبر (اے پی پی) مصر اٹی پاکستان نا سفیر ساجد بلال پارینے کہ پاکستان افریقی ڈیہہ تون رابطہ غاتا مون آ دننگ کن مصر اتون تین پہ تینی است خواہی خاص وڑاٹ سیاسی، اقتصادی، واپاری و دفاعی بشخ آتے ٹی رابطہ غاتے سوگو کننگ نا خواہندار ءِ۔ اوداخیال آتا درشانی ءِ مصر انا دارالحکومت اٹ اڈہلوک آ اسہ سیمینار آن تران کرساکرے ہراناسرحال ”افریقہ تون پاکستان نا رابطہ۔ آخبت نا براعظم“ ئس۔ سیمینار نا بست وبند ءِ قاہرہ ٹی پاکستان نا سفارتخانہ پاک مصر فرینڈ شپ ڈے انا وخت آ کرے ہراٹی مصری کمامدار، ایجشپین فیڈریشن آف چیمبرز آف کامرس نا عہدیدار، قاہرہ ٹی ڈین آف ڈپلومیٹک کور و پنی آ دانشور آک ہم تران کریر۔ ساجد بلال حکومت نا ”انگیج افریقہ پالیسی“ نا چرجوئی ٹی مصر اتون پاکستان نا ہڑتوم آ کنڈآتا تعلقداری نا سوگوی ٹی مروک آ پیشر فت ءِ تالان کرے۔ اوپاکستان نا جیو پالیٹکس آن جیو اکنامک نا کنڈآ چکار کننگ نا پالیسی ءِ ہم مون آ تخا۔ اوپارے کہ پوسکن آ پاکستان ترقیاتی حکمت عملی نا رداٹ گیشتر رابطہ و اقتصادی آسراتی تا فراوانی آن مثبت جہانی فائدہ غاتے کن محور ناحیثیت تخک۔ داوخت آ ”انگیج افریقہ پالیسی“ نا بارواٹ وزیرخارجہ شاہ محمود قریشی نا ویڈیو کلہو ءِ ہم نشان تننگا۔ سفارتخانہ نا واپاری و زرکاری اتاشی اسہ پریزنٹیشن اس ہم تس ہراٹی پاکستان نا واپاری و زرکاری لائخی و کاروبار دوست گام گیج آتون اوار اوار ساڑی حکومت نا کنڈآن کروک آ اصلاحات آتے ہم تالان کننگا۔ ترانکارآک پاکستان نا ”انگیج افریقہ پالیسی“ و ہڑتوم آ کنڈآتا تین پہ تینی وڑاٹ فائدہ ئی واپاری و زرکاری وارخواہی تیا چکار کرسا پاک مصر تعلقداری نا بارواٹ تینا خیال آتا درشانی ءِ کریر۔
