کراچی۔ 09ستمبر (اے پی پی) گورنر سندھ عمران اسماعیل تون بنجائی وزیر صنعت و پیدوار مخدوم خسرو بختیار گورنر ہاؤس اٹی اوڑدہی کرے۔ پنچ شنبے نادے آ جاری اعلامیہ نا رداٹ اوڑدہی ٹی انڈسٹریل زون تا شونداری و شونہالی و پاکستان اسٹیل مل انا بابت باندات آتون اوار تین پہ تینی است خواہی نا ایلو امور آ گپ وتران کننگا۔ گورنر سندھ بنجائی وزیر صنعت و پیدوار تون گپ وتران کرسا پارینے کہ صنعت آتا مون آ دننگ ملکی اقتصادی حالیت آتے کن است بڈی نا سوب ءِ وخت اس کہ انڈسٹریل زون تا شونداری و شونہالی تون گنڈوک گام گیج آتیان زرگزران پین سوگو مریک۔ عمران اسماعیل مستی پارے کہ کراچی ٹی روزگار کن افرادی قوت نا صنعت آتسکان آسان رسینگ نا رداٹ گام گیج ستاکڑزک۔ بنجائی وزیر صنعت و پیدوار مخدوم خسرو بختیار گورنر سندھ ءِ پارے کہ چنکا و نیامی درجہ نا کاروبار ءِ ودفنگ کن اولیتی گام گیج کننگ انگءِ۔ دارداٹ پوسکن آ ایس ایم ای پالیسی کاروباری نمو ءِ مون آ دیک، داڑتون اوار اوار صنعتی عمل تون وابستہ کاروباری برادری کن ہرممکنہ آسراتی فراوان کننگ ءِ۔ بنجائی وزیر مستی پارے کہ ایکسپورٹ پروسیسنگ زون تا بابت باندات آتے ایسر کرینن و زوت بنجائی کابینہ ٹی سلاہ و سوج آتے منظوری کن پیش کننگک۔ اوپارے کہ اسٹیل مل آتا دنگ اٹ 1500ایکڑ آ انڈسٹریل پاک و ایکسپورٹ پروسیسنگ زون تفنگ اُن۔ خسرو بختیار پارے کہ ویلیو ایڈڈ برآمد آتون گنڈوک صنعت آتے مون آ دننگ کن حکومت اولیتی بنداو تیا گام گیج کننگ ءِ۔
