اسلام آباد۔ 09ستمبر (اے پی پی) وزیراعظم عمران خان نا پارت آ پاک فضائیہ نا سی۔ 130جہاز اوغانستان نا الس کن کمکی گڑاتا اولیکو کھیپ ءِ ہرفسا کابل آ سرمس۔ دا جہاز پنچ شنبے نادے آ حامد کرزئی جہانی بالی پٹ آ دڑنگا۔ اوغانستان اٹی پاکستان نا سفیر منصور احمد خان و پبلک ہیلتھ انا سینئر آفیشل حاجی عمر کمکی گڑاتے تعلقدار اوغان کمامدارآتا دوٹی تس ہراٹی کم و ود 10ٹن نت، یک و نیم ٹن سی و بھلو کچ اسے ٹی دوائیک اوار ءُ۔ داڑے ملوک آ سرجم حوال آتا رداٹ داوخت آ میڈیا تون گپ وتران کرسا پاکستان نا سفیر منصور احمد خان پارے کہ پاکستان نا کنڈآن اوغانستان کن ہلہلہ امدادنا چرجوئی بناکرینے۔ دااولیکو جہاز ءِ وخت اس کہ ارٹ میکو جہاز اینو(جمعہ نادے آ) قندھار آ بریک وخت اس کہ کمکی گڑاتا اسہ پین جہاز اس خوست آ گدریفنگک و داچرجوئی داسہ برجاسلک۔ اوپارے کہ پاکستان نا سرکاری و نجی بشخ اتون اوار اوار خیراتی ادارہ غاتا کنڈآن خصوصی جہاز و طورخم چمن نا کسرتا کمک اٹ ہم کمکی گڑااوغانستان آ اتنگک۔ اوپارے کہ تدوک آ حکومت نا ہِننگ آن پد اوغانستان اٹی پک وڑٹ مشکل حالیت مون تروک ءِ۔ اسہ سوج اسے نا ورندی ٹی اوپارے کہ اوغانستان اٹی داوخت آ اوغان الس نا دمدستی گرج آتے پورو کننگ کن درکار انتظامی پنجر نا بابت عبوری سیاسی سیٹ اپ اس جوڑ کننگانے۔ نن اومیت کینہ کہ دا عبوری پنجر اوغان الس نا انسانی، شونداری و ایلو گورننس گرج آتے پورو کننگ کن کاریم کیک۔ ہراتسکان آخبت نا فریم ورک انا تعلق ءِ طالبان پارینے کہ او آخبتی سیٹ اپ اسے نا جوڑ کننگ آ کاریم کننگ ءُ ولے دا پد انا مرحلہ سے۔ داوخت آ اوغانستان اٹی انسانی و شونداری گرج آک زیات اہم ءُ۔ نن جہانی برادری و ایلو ہمسایہ ملک آتون رابطہ ٹی اُن۔ پاکستان اوغانستان نا بابت تعمیری پالیسی اس تینا کرینے و اونا تہہ نا باندات آتے ٹی نیام تمپننگ نا پالیسی آ سختی اٹ عمل کننگ ءِ۔ پاکستان اوغانستان اٹی امن و سوگوی کن کروک آ جہانی کوشست آتا بشخ اس مرساکرینے۔ داکان بیدس پاکستان اوغانستان تون زرگزرانی و علاقائی رابطہ کن سرگرم ءِ۔ اوپارے کہ اوغان الس پاکستان نا کنڈآن انسانی ہمدردی نا بنداو آ کمک و شونداری کاریم و اوفتا کڑد انا ستاءِ کیرہ۔
