اسلام آباد۔ 09ستمبر (اے پی پی) بنجائی وزیر خزانہ شوکت ترین پارینے کہ ملک اٹی جی ڈی پی گروتھ 4درسد اسکان ئس و اینخو نا سال اودے 4.8درسد آ دینہ، ننا زرگزران اٹ گچینی بننگ ءِ ہرانا سوب آن گروتھ ودک، اوغانستان تون واپار پاکستانی روپئی ٹی مریک، اوغانستان نا معاملہ نا ہڑدے ئی بنداو آ جاچ ءِ ہلنگ انگ ءِ، اوغانستان نا 9ارب ڈالر جہانی مالیاتی ادارہ غاتا کنڈآن توننگانے۔ داخیال آتا درشانی ءِ او پنچ شنبے نادے آ سینیٹ کمیٹی خزانہ ءِ حوال ترساکرے۔ بنجائی وزیر پارے کہ ایف بی آر نوٹس آتا چرجوئی ءِ توننگانے، ننتون یک و نیم کروڑ بندغ آتا ڈیٹا ارے ہرا سیلز خراج تننگ کیرہ، دا ڈیٹا ءِ نادرا غان دوئی کننگانے و اوفتے اسہ کلہو اس گدریفنگک، اگہ او کلہو آ تینا ورندی ءِ ایترہ تو سہی آخا تو کانودی کارروائی مریک، شوکت ترین پارے کہ ایکسچینج ریٹ داوخت آ ہراڑے ارے اوجاگہ غا مننگ نا ہدف ئس، ایکسچینج ریٹ ءِ مصنوعی وڑاٹ کم تخنگ آن نسخان مریک، ایکسچینج ریٹ انا فیصلہ ءِ اسٹیٹ بینک ءِ کروئی ءِ۔ اوپارے کہ سرسہب پاکستان پروگرام نا زوت بناءِ کننگک، اولیکوریسہ ٹی خیبرپختونخوا و بلوچستان اٹی سرسہب پاکستان پروگرام نا بناءِ کننگک، نن نیزگار آتے کن داپروگرام نا بناءِ کینہ، مچ آ پاکستان اٹ سرسہب پاکستان پروگرام نا بناءِ کننگ داسہ ممکن اف۔ اوپارے کہ اوغانستان نا مالی کوڑی تے دنیا نا کیہی ملک آک منجمد کرینو۔ اوغانستان نا بابت اسہ سوج اسے نا ورندی ٹی اوپارے کہ اوغانستان تون واپار پاکستانی روپئی ٹی مریک۔ منہ ہفتہ غان پد دامعلوم مریک کہ اوغانستان تون واپار آ انت اثرتمک، اوغانستان نا ساڑی آحالیت آتے معمول آتے چلیفنگ کن داکان افرادی قوت نا فراوانی نا دروشم اٹ کمک کننگ مریک۔ اکتوبر اٹ کمیٹی ءِ اولیکو سہ ماہی نا کارکڑد نا بارواٹ حوال ایتیوہ۔ اگست اٹ امپورٹ بل اٹی ودکی مس، ماہانہ بنداو تیا درآمد، برآمد تون اوار زرگزران نا جاچ ءِ ہلنگک، پائیدار شونداری کن زرگزرانی بشخ آتا جاچ ءِ ہلنگ انگ ءِ۔
