اسلام آباد۔ 08ستمبر (اے پی پی) بنجائی وزیر حوالکاری و شینکاری چوہدری فواد حسین پارینے کہ متحدہ عرب امارات دے ٹک نیامی ٹی پاکستان نا غٹ آن بھلا واپاری شریدار ءِ، یواے ای ٹی شانزدہ لکھ پاکستانی رہینگ انگ ءُ ہر اپیشن نا ملک پاکستانی تا ایلو بھلا رہینگ انگ نا جاگہ ءِ، یواے ای کوویڈ آن پد غٹ آن بھلا ایونٹ ایکسپو2021ء نا اڈتننگ والا ءِ ہراڑآ اودے مبارکبادی ایتنہ۔ داہیت ءِ او متحدہ عرب امارات نا سفیر حماد عبیدابراہیم الزابی تون گپ وتران کرساپارے ہرا چارشنبے نادے آ داڑے اوڑتون اوڑدہی کرے۔ بنجائی وزیر حوالکاری پارے کہ دوبئی ٹی مروک آ ایکسپو 2021ء ٹی داوار تینا وڑانا اسہ یکتا ءُ پاکستانی پویلین اس مریک، وزارت واپار و وزارت حوالکاری داایکسپو ٹی بشخ ہلنگ کن پبی تیاری کننگ ءِ۔ ڈیہہ نا حالیت آتا بارواٹ گپ وتران کرسا بنجائی وزیر حوالکاری پارے کہ اوغانستان اٹی امن و سوگوی ڈیہہ نا فائدہ ٹی ءِ۔ پاکستان اوغانستان اٹی امن و سوگوی کن مخلصانہ کوشست کرے۔ اوپارے کہ کابل آن درملکی شاری تا پیش تمنگ اٹ ننا کڑد انا مچ آ دنیا ستاءِ کرینے۔ چوہدری فواد حسین پارے کہ پاکستان و متحدہ عرب امارات نا نیام اٹ السی کہول آ رابطہ غاتا مون آدننگ اٹ یواے ای ٹی رہینگوک آ پاکستانی کمیونٹی نا کڑد بھاز اہمیت تخک۔ داوخت آ یواے ای نا سفیر پارے کہ متحدہ عرب امارات و پاکستان نا نیام اٹ غٹ بشخ آتے ٹی تعلقداری تے سوگو کننگ کن سنبرینگوک ءِ۔ اوپارے کہ پاکستان ڈیہہ خاص وڑاٹ اوغانستان اٹی سوگوی کن بھلو کڑد اس ادا کرے ہراستاکڑزک۔ اوڑدہی ٹی ہڑتوم آ کنڈآتا تعلقداری، چندی بشخ آتے ٹی کمکاری نا مون آ دننگ، اوغانستان و ڈیہہ نا حالیت آتون اوار تین پہ تینی است خواہی نا باندات آ گپ وتران مس۔
