اسلام آباد۔ 08ستمبر (اے پی پی) وزیراعظم نا خصوصی کمکار امور نوجوانان عثمان ڈار پارینے کہ وزیراعظم عمران خان ورناتا کچ ءِ ودفسا تینا دھرتی نا قرض ءِ ہم ادا کننگءِ، سرسہب ورنا پروگرام نا تربیت یافتہ ورناک تینا بشخ آتے ٹی دنیا نا مقابلہ ءِ کیرہ، اسہ لکھ 70ہزار ورناتا اسلکل ڈویلپمنٹ ناہدف ءِ پورو کننگ نا خڑک ءِ۔ داخیال آتا درشانی ءِ او چارشنبے نادے آ تینا جاری بیان اٹی کرے۔ عثمان ڈار پارے کہ ورناتا کاریم نا کچ ءِ ودفسا عمران خان تینا دھرتی نا قرض ءِ ادا کننگءِ۔ ننا کوشست ءِ کہ پاکستانی ورناک پوسکن آ دنیا نا رمب اٹ پدی سلپس۔ اوپارے کہ سرسہب ورنا پروگرام نا تربیت یافتہ ورناک تینا بشخ آتے ٹی دنیا نا مقابلہ ءِ کیرہ۔ اسہ لکھ 70ہزار ورناتا اسلکل ڈویلپمنٹ نا ہدف پورو مننگ نا خڑک ءِ۔ بیان اٹی داہم پاننگانے کہ سرسہب ورنا پروگرام وام تننگ تون اوار اوار دھرتی نا قرض ءِ ہم ادا کننگ ءِ۔ وام آخا، بڑزکو تکنیکی کورس آتے ٹی ہم سرسہب ورنا پروگرام مونی ہنانے۔ سرسہب ورنا پروگرام ہزار آ پاکستانی ورناتے پوسکن آ دور انا خواست آتون گنڈا۔ سرسہب ورنا پروگرام اسہ سال اٹی 95ہزار 710بڑزکو کسبکار ورناتیارکرے۔ ورناتا ہائی ٹیک اسکل کن اسہ سال اٹی 4ارب 30کروڑ نا اسکالرشپ تننگا۔ ہائی ٹیک کورس مرے یا مکینکل و فنی تربیت، تربیتی پیکج آتا پورو سرجم آتے ویپ آ شاغنگا۔ ہائی ٹیک اسکل اسکالر شپ انا رداٹ 36ہزار 369ورناک پوسکن آ کورس آتے پورو کرینو۔ داکان بیدس بیان اٹی اسہ رپورٹ اسے نا حوالہ ءِ تننگانے کہ بڑزکو تربیتی اسکل اسکالر شپ آ 2ارب 54کروڑ روپئی خڑچ مس۔ روایتی کسب نا کورس آتے پورو کروک آ ورناتا کچ 41ہزار آن گدرینگانے۔ روایتی کسبکاری ہیل تننگ آ 1ارب 64کروڑ روپئی نا اسکالر شپ تننگا۔ 16ہزار 605ورناتے مکینکل وڑانا رسمی کورس ہم کرفنگا۔ ورناتا کسبی مہارت نا ودنگ آ 7کروڑ 47لکھ روپئی خڑچ کننگا۔ رپورٹ اٹی پاننگاکہ پوسکن آ کورس آتیان فائدہ ہرفوک آتے ٹی کارپوریٹ سیکٹر نا 16سد ورناک ہم اوار ءُ۔ چندی کمپنی تیٹی کاریم کروک آ دا 16سد ورناتا تربیت آ 3کروڑ، 84لکھ خڑچ مس۔ ہائی ٹیک اسکل نا 28ہزار سرٹیفائیڈ ورناتے ٹی 13ہزار ءِ نوکری ہم ملانے۔ پیشن نا ملک آتیا ہنوک آ سد آ کسب کار ورناتا ماہانہ کٹیا سوالکھ روپئی اسکان سرمسنے۔
