اسلام آباد۔ 08ستمبر (اے پی پی) بنجائی وزیر حوالکاری و شینکاری چوہدری فواد حسین پارینے کہ طالبان تتون ننا ہیت و گپ مرسا کرینے، بھارت پاکستان نا برخلاف پدریسہ پروپیگنڈا کننگ ءِ، بھارتی میڈیا اسہ ویڈیو گیم اسے ٹی جنگ ءِ نشان ترسا داپاش کننگ نا کوشست کرے کہ پنچ شیر جلہو آتے ٹی پاکستان کارروائی کرے، بدبختی اٹ بھارت نا داوڑنا پروپیگنڈاغاتیان لس بندغ زہمی مریک۔ داخیال آتا درشانی ءِ او بی بی سی ورلڈ اتون گپ وتران کرسا کرے۔ اوغانستان اٹی نگران سیٹ اپ نا بابت سوج انا ورندی ٹی بنجائی وزیر حوالکاری پارے کہ اوغانستان اٹی نگران سیٹ اپ آ ردعمل تننگ وخت آن مست مریک۔ نن بایدے زرس انتظار کین، داوخت آ داڑآ ہیت کننگ سہی اف۔ اسہ پین سوج اسے نا ورندی ٹی اوپارے کہ میڈیا نا کمک اٹ معلوم مس کہ سی آئی نا سروک کابل اٹی ئس، میڈیا نا حوال آتیا معلوم مس کہ ترکی و قطر انا انٹیلی جنس انا سروک آک ہم کابل اٹی ساڑی ئسر۔ اگہ نن تینا وزیر خارجہ ءِ کابل آ راہی کروسن تو او ہموڑے دیر تون اوڑدہی کریکہ؟ ہموڑے اسہ وزیر خارجہ اس ہم ساڑی الوکہ۔ اوپارے کہ باضابطہ حکومت نا ساڑی مفننگ اٹ اسہ ہندن ءُ فریم ورک اسے نا ضرورت مریک ہراڑے ہڑتوم آ ملک آک اسہ ایلو ءِ مون تروک ویل آتیا ہیت کننگ کیر۔ کابل اٹ باضابطہ حکومت ناساڑی مفننگ اٹ انٹیلی جنس ادارہ غاک داوڑنا فریم ورک جوڑ کیرہ۔ اسہ سوج اسے آ بنجائی وزیر حوالکاری پارے کہ ننے اوغانستان تون سنگین ویل مون تروک مسنے ہرافتے ٹی داعش اٹ توسیع، پناہ گزین تا ویل و ٹی ٹی پی نا اوغانستان آن مائیگریشن اوار ءِ۔ اوپارے کہ طالبان آتون ننا گپ وتران مرسا کرینے، پاکستان طالبان تا امریکہ تون مذاکرات اٹ کمک فراوان کرے۔ اوغانستان اٹی درملکی شاری تا پیش تمنگ اٹ پاکستان کمک فراوان کرے، نن اوغانستان اٹی اختہ ہزار آ بندغ ءِ کشان، اوغانستان آن درملکی شاری تا پیش تمنگ نا ننا کوشست آتا مچ آ دنیا ستاءِ کرینے۔ بنجائی وزیر حوالکاری پارے کہ 2007ء و 2011ء ٹی ہراکہ نن پارینہ او سہی پک مس۔ اگہ ہمووخت آ ننا ہیت ءِ مننگاکہ تو اینو اوغانستان اٹی حالیت جتا مسکہ۔ اوغان جنگ اٹ ننے 80ہزار جان تا نسخان ہرفوئی تما، ننا 150ارب ڈالر نا زرگزرانی نسخان مس۔ اسہ پین سوج اسے نا ورندی ٹی چوہدری فواد حسین پارے کہ بھارت پاکستان نا برخلاف پدریسہ پروپیگنڈا کننگ ءِ۔ بھارتی میڈیا اسہ ویڈیو گیم اسے ٹی جنگ ءِ نشان ترسا داپاش کننگ نا کوشست کرے کہ پنچ شیر جلہو آتے ٹی پاکستان کارروائی کرے۔ بھارتی میڈیا نا غٹ ٹاک شوتے ٹی داکسہ ءِ جوڑ کننگا، داڑآن معلوم مریک کہ بھارت اٹ مارکیٹنگ ایجنسیک ہراوڑ کاریم کیرہ۔ اوپارے کہ بدبختی اٹ بھارت نا داوڑنا گام گیج و پروپیگنڈا غاتیان لس بندغ زہمی مریک۔
